Read Biblija - Pe Baltitko Romani čib (Romanes) 2019 Baltic Romani Bible Ióvo 11 Bible Online

Ióvo 11 - Biblija - Pe Baltitko Romani čib (Romanes) 2019 Baltic Romani Bible bible

Ióvo 11

¹Tén'ci Sofaro Naamostyr otphendiá lavénca:

²“Ci naštý te otphenes pe but phučibena? Ci buté-rakiribnytkone manušénge javír manušá isyn bangé te phenén, so léskiro isyn čačipén?

³Ci so tyró xohanó rakiribén začhuvela manušén te javén dro ramánjo (miro)? Ci syr tu sasape xoliames, tedy so ž naštý te ladžakiren tut?

⁴Pal-dová so tu ž phendián: “Miré-patiaibnaskiro sykliakiribén isyn bibangiakiri, i me som bidošéngiro dre tumaré jakhá.”

⁵Ne, sob (kaj) Devél te lel te rakirél i te otkerel Péskire uštá pe túte;

⁶i, sob (kaj) Jov te sykavél túke godypnaskire čorahanybena, syr davá isyn, so jone dre duj móly piridžana dová, so Tyrí godý saštý te poduminel. Džin, so Devél otmekéla túke but tyré čoripnástyr.

⁷Ci moginésa tu te rozĥaljos saró xoripén, Savó Devél isyn?

⁸Ci moginésa tu te ĥaljos Sarezorjakire Devlés ke pherdypen?

⁹Džinybén pal Devléste isyn dlengedyr phuvjátyr i isyn buĥledyr morjostyr (derjavestyr).

¹⁰Kóli Jov prodžála pašýl, Jov phandela dre zandirjá (cépi/kovy) i Jov kharéla pe séndo, kon moginéla (saštý) te terdjol proti Léste?

¹¹Pal-dová so Jov džinéla godiakire manušén; Jov adiáke-pac' dykhéla fuipén tedy, kiéli manúš naštý až i te poduminel;

¹²ne bigodypnaskiro manúš naštý te javél godytko, rovnes adiáke-pac' syr i manúš saštý te bijandjol dasavo sýrby khuroro busone (dikone) oslicatyr.

¹³Kóli tu riskiresa mištés tyró iló i protyrdesa péskire vastá ke Jov,

¹⁴i čhuvésa čoripén dur péskire vasténdyr i tu na domekesa, sob (kaj) fuipén te dživén dre tyré šátry,

¹⁵tedy tu bi kunipnaskiro moginesas te ĥazdes péskiro bidošéngiro šeró, i tu javésa nabadiakiribnytko, i tu na daresas nisostyr,

¹⁶pal-dová so tu bistresa pal tyrí bari bída, i pririkiresa pal láte sýrby pal paniá, so našné krig,

¹⁷i tyró džiibén javéla jasnedyr parné dyveséstyr, mek i sys ciamlo túte dre jakhá, na javéla jasno syr zlóko (ránko).

¹⁸I javéla túte zoraló patiaibén, pal-dová so túte javéla nadiéia, i kaj tu na rozdykhesa paš péste, javésa te otkhinjos bi darákiro.

¹⁹I javésa tu te pasjos, i nijékh na javéla te darakirel tut, i but manušá javéna te phenén pomija (pljotki), sob (kaj) te pokerenpe túke.

²⁰Ne fujé-manušéngiro dykhibén xasjola, i jone na našéna bidatyr, i léngiri nadiéia pirijačéla te dyhinel syr i léngiro džiibén.”