Read Biblija - Pe Baltitko Romani čib (Romanes) 2019 Baltic Romani Bible Ióvo 16 Bible Online

Ióvo 16 - Biblija - Pe Baltitko Romani čib (Romanes) 2019 Baltic Romani Bible bible

Ióvo 16

¹I otphendiá Ióvo lavénca:

²“Me šundjom but kadalé čačipená; tumé san bedytka podrikiribnaskire.”

³Ci javéla kónco (jagóro) pe dalé balvalitka lavá? Ci, so špulela (pihinela) tut te otphenes adiáke mánge?

⁴Me adiáke-pac' moginavas te rakiráv, syr tu: kóli te javes pe miro štéto. Me moginavas te skedav lavá pe túte, i te trinskirav šerésa pe tuménde;

⁵ne me podrikiravas miré lavénca, i miré-uštengiro ramanipen (miro) lokhiakirelas tyré-ileskiri dukh.

⁶Mek me i rakiráva, miré-ileskiri dukh na lokhija, i mek me pirijačava, ci mánge isyn lokhedýr?

⁷Ne akaná Devél kerdiá adiáke, so me som khiniakirdo; Tu, Dévla, xasiakirdian sarí mirí sém'ia (irí);

⁸Tu kerdián adiáke, so me som saró dre morški i davá isyn dosykaiben pe mánde. Tu vyšut'kirdian man dre pietrjonka (izmoždjono) — i davá adiáke-pac' isyn dosykaiben, kon dophenéla pe mánde.

⁹Devél kušela man Péskire xoliakiribnastyr i Jov bidykhela man; Jov riskiréla skriežetasa Péskire dandá pe mánde. Miro vérgo vostrinela péskire dandá pe mánde.

¹⁰E manušá putravena péskire jakhá pe mánde, jone pekavena man pir čhama (ščoki), bangiakiri, jone kedenape khetané pe mánde.

¹¹Devél piridyja man nadevlytkonenge, i čhurdyjá man dre fujé-manušéngire vastá.

¹²Me dživdjom štylés, ne Devél zaphagirdia man, Jov adiáke-pac' lyjá man pal men i rostrinskirdia man pe koterá, i Jov čhudiá man syr bakrés te den kar'je.

¹³Léskire kar'jé-dyibnaskire (striel'cy) obgine trusciál mánde, Jov promardia miro iló, i Jov na tanginela man. Jov vyčhuvela miro želučo pe phuv.

¹⁴Jov phagiréla man riskiribnasa dre masá jekh pal jekh; Jov prastala pe mánde, sýrby Jov isyn zoralypnaskiro maribnýtko.

¹⁵Me sydjom péske žalobno gonó pe mirí cýpa, i čhudjom péskiro šeró dro práho.

¹⁶Miro muj isyn loló jasvendyr, i pe miré cymbly isyn meribnaskiri zer (tien'),

¹⁷mek i nane nahrata réndy pe miré vastá, i mirí pátieri (molítva) isyn bidošengiri.”

¹⁸E phuv! Na čhakir miro rat, i me te javél šundly mirí gódla.

¹⁹Ĥáda, akaná, isyn miro Jakhítko pe bolybén, i davá isyn Jov, Kon zaterdjola pal mánde.

²⁰Miré malá sanape xoliames mándyr, miré jakhá čhuvéna jasva ke Devél.

²¹O, sob (kaj) te javél vari-kon te mangél zoralés pal manušéste angíl Devléste, syr i manúš mangéla zoralés pal léskire pašatuneste.

²²Pal-dová so syg javéla kónco (jagóro) pe kadalé beršá, Me džáva dromésa odorík, katýr nane risiben.”