Read Biblija - Pe Baltitko Romani čib (Romanes) 2019 Baltic Romani Bible Ióvo 18 Bible Online

Ióvo 18 - Biblija - Pe Baltitko Romani čib (Romanes) 2019 Baltic Romani Bible bible

Ióvo 18

¹O Vildado Savhejanino (Šuahostyr) rakirélas javír mólo, i otphendiá lavénca:

²“Kiéli končynesa tu te čingirespe lavénca? Jav godypnaskiro, i tén'či (poslie) ame javása te rakiras.

³Sóske tu dykhésa pe aménde syr pe murdalénde (žyvotnonende)? Ióvo, sóske ame sam nažužé dre tumaré jakhá?

⁴Tu roskušesa pes péskire xoliátyr, ci so tedy pal túte manušénge te jačaven phuv? Ci, so skála kharélape péskire štetóstyr?

⁵Ne fujé-manušéngiro dud murdjola, i momoly léskire jagatyr na javéla te ziainel.

⁶Dud jačéla ciamlo dre léskiri šátra, i léskiro momolýtko (svietíl'niko) murdjola.

⁷Zor javéla te udžal léskire šagendyr (lamniéndyr), a léskiro plano lydžála les kokores te perél.

⁸Pal-dová so léskire ĥerá kokoré lydžána les dre khudý (miriéža), i jov štavela ke feliá.

⁹Čirikliengiri felý podtyrdela les pal pienta (khur), a felý pe phuv uhtyléla les pal ĥerój.

¹⁰Šoškengiro (xorjoskiro) kapkano isyn garadó léstyr, i felý sietkasa isyn pe drom.

¹¹Trašaibén pal trašaibén darjakirena les kažnoné rigátyr, i pal léste tradenape palál léskire piénty (khurja).

¹²Bokh sýrby vyhaia léskiro zoralypén, i bari bída, isyn paš léste, užakiréla pe léste.

¹³Meribnytko nasvalypen shala sarésa léskire masá, jov pohaia sarésa léskire ĥerá i vastá.

¹⁴Meribén vyriskirela les léskire šatratyr, kaj jov sys bi darákiro, i lydžála les telé ke králi pe baré bidy.

¹⁵Dre léskiri šátra javéna te dživén čúža manušá, a siéra (dzevélia) počhuvena pir léskiro kheratuno štéto:

¹⁶léskire kórni (rukhá) vyšutjona telalestyr, a léskire randiá zašutjona uprál.

¹⁷Ripiribén pal léste xasjola pe phuv, i léskiro lav bistrena pe vulícy (pe gásy).

¹⁸Les tradéna krig dudéstyr (svetóstyr) dro kalypén, les vytradena phuvjátyr, kaj manušá dživéna.

¹⁹Léste na javéla ni čhavó, ni plimieniko maškír léskire manušénde, nijékh na jačélape pe léskiro kheratuno štéto.

²⁰Dívo ke dar uhtyléla manušén zapadostyr dolé dyveséstyr, a manušá vastokóstyr trašadjona.

²¹Adiáke isyn kheratune štetosa, kaj dživdiá načipnaskiro manúš, dasavo-pac' isyn drom kodoléske, kon na džinéla Devlés.”