Read Biblija - Pe Baltitko Romani čib (Romanes) 2019 Baltic Romani Bible Ióvo 2 Bible Online

Ióvo 2 - Biblija - Pe Baltitko Romani čib (Romanes) 2019 Baltic Romani Bible bible

Ióvo 2

¹I sys dyvés, kiéli Devléskire čhavé (Jangóly) javné te sykadjon angíl Raste-Devléste, i nálačho adiáke-pac' javdiá maškír lénde te sykadjol angíl Raste-Devléste.

²I phendiá Raj Devél nalačheske: “Katýr tu javdián? I nálačho otphendiá Ráske-Devléske i phendiá: “Me psirdjom odorík i pale pir phuv i štadjom pir phuv upré i telé.”

³I Raj Devél phendiá nalačheske: “Ci pridykhcianpe tu pe miro dynári Ióvo? Nane nijékh manúš pe phuv, kon te javél adasavó bidošéngiro i devlýtko, savó daréla Devléstyr i obrikirela pes te na kerél bibáht? I savó saroiékh rikirélape zoralés dro péskiro bibangipen, na dykhí pe dová, so tu podhačkirdian man pe léste, sob (kaj) Me te xasiakiráv les bi pričynakiro.”

⁴I nálačho otphenélas Ráske-Devléske i phendiá: “Cýpa pal cýpa, i, čačó, manúš saró otdéla pal péskiro džiibén.

⁵Ne tu protyrde angíl Tyró vast i čilav léskire kokalý, i, léskire masá, i podykh, ci bahtiakiréla jov tut [jov, čalés, keréla prokošybén (arman) pe túte ke muj Tyró-ju.o.].”

⁶I phendiá Raj Devél nalačheske: “Ake, jov isyn dro tyró vast, ne tu zrákh léskiro džiibén.”

⁷I nálačho gijá krig Rástyr-Devléstyr, i jov dukhadia Iovos xoliamé prokazasa (dukhane fransenca) ĥerjakire podešvatyr ke léskiro šeró.

⁸I lyjá Ióvo vaš péske kotér (kusko) čeriepičnone pirjatyr, sob (kaj) lésa te randel kokoró pes; i besciá jov maškír práska (piéplo).

⁹I phendiá léskiri romný léske: “Tu saroiekh rikiresape zoralés dro péskiro bibangipen. Prokoš (ker armania) Devlés i mer.”

¹⁰Ne jov phendiá láke: “Tu rakirésa syr jékh pharé-šereskire džuvliendyr, saví phenelas: ame adiáke-pac' doresciam lačhipén Devléstyr, i ci aménge adiáke-pac' te na prilas bibáht?” Paló saró davá Ióvo na phendiá grého péskire ušténca.

¹¹I javné trin Iovoskire drúgi (malá), kiéli jone šundlé pal sarí bibáht, so pyjá pe léste. I kažno (sváko) léndyr javdiá péskire štetóstyr: O Elifazo Fiemanostyr, o Vildado Savhejatyr [Šuahostyr-ju.o.], o Sofaro (Cofaro) Naamitostyr; i jone dorakirdepe te javén, sob (kaj) te tuginen lésa, i sob (kaj) te podrikiren les dro dúho (fáno).

¹²I syr jone ĥazdyné péskire jakhá durál, tedy jone na pindžkirde (na ĥalyné) les; jone dynepe te rovén zoralés. Kažno léndyr riskirdiá péskiro uribén, čhurdyjá práho upré pe bolybén pe péskiro šeró.

¹³I jone bešné khetané lésa pe phuv pe eftá (bitrinéngiro deš) dyvesá i eftá ratia, i nijékh léndyr na phendiá lav léske, pal-dová so jone dykhné, so léske sys drieván pharó.