Read Biblija - Pe Baltitko Romani čib (Romanes) 2019 Baltic Romani Bible Ióvo 20 Bible Online

Ióvo 20 - Biblija - Pe Baltitko Romani čib (Romanes) 2019 Baltic Romani Bible bible

Ióvo 20

¹I Sofaro Noamostyr otphendiá lavénca:

²“Ake, sóske miré dúmy déna otphenybén mánge, i vaš dová me sygniakiravape.

³Me šundjom, syr man zoralés bangiakirde, i ladžakirdé, i miro dúho (fáno) otphenéla pal mánde adiáke, syr me ĥaljovava.

⁴Ci na džinésa tu, so davá isyn ĥaratuné beršéndyr tedy, syr manúš javdiá pe svéto (lot),

⁵so fuj manušá svenkinena ke vučipén naĥara (nadluges), i so fujé-manušéngiri rádyma urikirelape féni (tóka) minuta (menta)?

⁶Mek léskiri pyšnyma te ĥazdelpe ke bolybén, i léskiro šeró te tyrdelpe ke óbloki,

⁷ne jov xasjola pe saré viéki sýrby léskire otbrosy, sósa jov psiréna javrí. I kodolé, kon dykhciá les, phenéna: “Kaj isyn jov?”

⁸Jov vurniala krig syr godengiro sunó, i les na lathéna; i jov vari-kaj xasjola, sýrby zdanki ratý.

⁹Jakhá, so dykhné les, na dykhéna butýr, adiáke-pac' i léskiro štéto.

¹⁰Léskire čhavé javéna te den pale lové čororenge, a léskire vastá riskirena pale saró péskiro barvalypén.

¹¹Léskire kokalý isyn pherdé léskire-ternypnaskire grehénca, ne jone xasjona lésa khetané dro práho.

¹²Mek te kerél bibáht isyn sýrby gudló xabén dro léskiro muj, i jov garavela la tel péskiri čib,

¹³mek jov i te prigaravel la, i te na mekel la: a jov rikiréla la dro péskiro muj;

¹⁴davá léskiro xabén dre vindyrja jačéla šutlo, i pirikerelape dre sapeskiri truta andrál léste.

¹⁵Jov nakhadia (glytyndia) barvalypén, ne jov čadela lésa pale: o Devél tyrdela javrí zorjása davá barvalypén, až perestyr.

¹⁶Jov javéla te žuinel meribnytkone sapeskiri truta; ne saplyniakiri čib muliakiréla les.

¹⁷Jov na javéla te dykhél rekicy, réki (leniá) so thadena avginesa i thuliasa.

¹⁸Jov déla pale dová, so jov doresciá pharé butiátyr, jov naštý te nakhavel la; jov na javéla te radynélpe kofostyr, so jov doresciá péskire rendostyr.

¹⁹Pal-dová so jov pritasadia i mekciá čororen, so jov nahrates zauhtyldia kher, savó jov na gazdyja.

²⁰Vaš léskiri ĥalkima jov na otkhinjolas, jov nisó na zrakhciá, sob (kaj) jov te zakamel.

²¹Jov isys prohaibnaskiro, i nisosa zrakhciape léstyr: vaš-dová so léskiro mištypén na javéla ĥará te urikirelpe.

²²Na dykhí, so léste isyn pherdó mištypén, jov javéla dre bari traš; kažnoné — Manušéskiro vastá, konéske jov kerdiá bari bída, javéla pe léste.

²³I javéla adiáke: jov javéla pe nábut (kutý) skedynó te pherdiakirel péskiro per, to tedy Devél bičhavéla pe léste Péskiri xačkirdy xolý, so délape syr bryšýnd pe léste.

²⁴Kóli jov i našela krig maribnytkoné sastyrendyr, tedy bronzytko lúko pusavela les pirdál (skroz').

²⁵Jov potyrdela sastruny bust javrí maséndyr, joj vydžála, i adiáke-pac' vydžála ziaindly ostrima pe bustiakiro jagóro (kónco) pirdál želučytko buko: trašaibén peréla jekh pal jekh pe léste.

²⁶Pherdó kalypén čhakirela léskiro barvalypén: jag, saví nikón na murdiakirela, xála sarésa saró, so jačélape dre léskiri šátra.

²⁷Bolybén sykavéla léskiro čoripén, i phuv ĥazdélape pe léste.

²⁸Léskire-kheréskiro pribaripen xasjola, a léskiro mištypén lydžána krig baré paningá dro dyvés, syr Devél xoliasóla te sendinel.

²⁹Kadasavi isyn fujé-manušeskiri dólia Devléstyr; ĥáda, isyn léskiro mištypén, so Sarorikiribnaskiro Devél otčhindia léske.”