Read Biblija - Pe Baltitko Romani čib (Romanes) 2019 Baltic Romani Bible Ióvo 21 Bible Online

Ióvo 21 - Biblija - Pe Baltitko Romani čib (Romanes) 2019 Baltic Romani Bible bible

Ióvo 21

¹I otphendiá Ióvo lavénca:

²“Šunén važlives (rakhibnýtkes) ilésa miro rakiribén, i mek davá te javél tumaró ramanipen (utiešenijo) mánge.”

³Vyrikiren (potierpinen) dalésa, so me phenáva: i paló dová, syr me vyphenavape, tedy tumé saštý te sanpe xoliamas mándyr.

⁴Me na žalinavape pe manušéste, čačó? Ci, kóli i isyn davá adiáke tedy i mánde, xaj, moginéla te na uhtylel miro dúho (fáno)?

⁵Pridykhenpe pe mánde, i mek dívo te uhtylel tumen; pričhuvén vast te zaphanden péskiro muj.

⁶Adiáke-pac' i syr me féni duminava pal davá, tedy mánde trašaibén ke meribén, i saré miré masá izdrana.

⁷Ĥáda, sóske fuj manušá ĥará (dlúges) dživéna, i jačéna phuré, i jačéna zoralypnaskire maškír manušénde?

⁸A léngire palál — javibnaskire čhavé (unuki) začhuvena péskiro džiibén pašýl lénde, i léngiro ródo barjola pe léngire jakhá.

⁹Dre léngire kherá nane dar, adiáke-pac' i nane Devléskiri ran te sykliakirél len pe lénde.

¹⁰Léngire guruvestyr lotjona mištés, cielianty bidošakires, léngire gurumnia isyn ciel'na, i na našavena tyknen.

¹¹Jone vymekena péskire bijatén syr bakrorengiro gurtyco, i léngire čhavoré khelena.

¹²Jone bagana zoralés tel bubno i luta, i jone radynénape péske tel svirol'ka.

¹³Léngire dyvesá džána dro mištypén, i pirdál menta jone džána telé dro liúno (prieispodnia).

¹⁴I jone phenéna Devléske: “Durjov améndyr. Pal-dová so ame na kamasa zoralés te džinas Tyré dromá!

¹⁵Kon isyn Sarezorjákiro, sob (kaj) ame te dynarinás Léske? I savó lačhipén aménge, so ame javása te mangaspe Léske?

¹⁶Ĥáda, léngiro mištypén isyn dre léngire vastá: ne me na psirava pe kadalé bede-manušéngiri skedyny.

¹⁷Kicý móly tumé dykhné, so bede-manušéngiro momolýtko (svietíl'niko) murdjola? Kicý móly bari bída peréla pe lénde? Ci xasiakiréla Devél bibahtalé manušén dre péskiri xolý?

¹⁸Ci so, xaj, balvál rosphurdela krig len syr phuv, i so, xaj, bari balvál uhtyléla krig len sýrby čhučó phus?

¹⁹Tumé phenéna: “Devél prirakhela léngire čoré réndy vaš léngire čhavénge?’ Nad: mek Devél te otpleskirel pale dadéske,

²⁰sob (kaj) jov te džinél davá: ake, mek léskire jakhá te dykhén péskiro xasibén, mek jov te p'jel tahtái, so isyn pherdó Sarezorjakire baré xoliása?

²¹Saví ž zabota javéla léske léskire čhavéndyr paló dová, syr končynenape léskire čhoná te dživén?

²²Ci manúš saštý te sykliakirél Devlés? I davá ž isyn Jov, Kon sendinela kodolén, savé isyn pe vučé štéty.

²³Jekh manúš meréla dre sarí péskiri zor, savó dživdiá, vol'nes i bidarakiro;

²⁴léskire masá andrál isyn pherdé thulypnasa, i čekén (thulypen) dre léskire kokalý isyn sapano.

²⁵Javír manúš meréla kirkipnasa pe léskiro di, jov nijékhvar na xaja čalés:

²⁶ne jene dujdžiné khetané pasjona dro práho, i kirme čhakirena len.

²⁷Ake, me džinóm tumaré dúmy, i plany, sob (kaj) te bangiakiren man.

²⁸Tumé ž rakiréna: “Kaj isyn thagariskiro kher? I kaj isyn šátra, dre saví dživéna beda manušá?”

²⁹Ci na phučné tumé manušéndyr, savé tradéna droménca? I so tumé na šundlé léngire dophenybena?

³⁰So fuj manúš isyn prigarado dro dyvés, syr javéla bari bída, i les lydžána dre rig, syr javéla Devléskiri xolý.

³¹Kon bangiakirela mamúj ke léskiro muj, so jov kerélas? Kon skušela xolý pe léste?

³²A manušá lydžána les ke maĥila, i stréga javéla pašýl leskir koplíca.

³³Phuvjákire koterá dre ĥanbín javéna gudlé léske, kažno manúš džála pal léskiro mulykano (ĥrobo) pe garaiben, i but manušá, so naštý te pogines, džána angíl léste.

³⁴Syr tedy tumé podrikirena miro dúho (fáno) čhučé lavénca? Save načačune isyn tumaré otphenybena!”