Read Biblija - Pe Baltitko Romani čib (Romanes) 2019 Baltic Romani Bible Ióvo 23 Bible Online

Ióvo 23 - Biblija - Pe Baltitko Romani čib (Romanes) 2019 Baltic Romani Bible bible

Ióvo 23

¹I otphendiá Ióvo lavénca:

²“Adiáke-pac' i ke adadyvés me iščo (inké) žalinavape; miré mén'ki isyn pharedyr miré gondiéndyr (uzdohendyr).

³O, sob (kaj) mánge te džináv, kaj me moginavas te lathav Les, sob (kaj) mánge te javav ke Léskiro štéto!

⁴Me čhuvavas angíl miro réndo angíl Léste i miro muj javélas pherdó zoralé lavénca;

⁵sob (kaj) me te džináv lavá, savénca Jov otphenélas mánge, i sob (kaj) me te ĥaljovav, so Jov phenéla mánge.

⁶Naúšto Jov javélas te lydžál čingárd mánca saré Léskire baré zorjátyr? Nad. Ne Jov risjola te šunél man.

⁷Odój devlýtka manušá moginénas te pirirakiren pričyny Lésa, i me vyrakhavaspe ŭsády (sak) miré sendaristyr.

⁸Ake, — me džáva angíl, ne Jov nane odój, i me pale, ne me naštý te rozdykhav Les;

⁹syr Jov keréla butý pe zérvo (liévo) rig, me naštý te dykháv Les; kiéli Jov risjola pe čačí (pravo) rig, me na mogináva te dykháv Les.

¹⁰Ne Jov džinéla drom, savésa me džáva, i Jov propatiakirdia man i me vydžava syr suvnakái.

¹¹Mirí ĥerój rikirdiape zoralés pe Léskire dromá; me gijom ukrat (točnes) Léskire dromésa, i me na risijom dre rig.

¹²Me na čhurdyjom pe rig priphenybená Léskire uštendyr, me rakhcjom dre godý syr suvnakáj Léskire — uštengire lavá fedýr miré xabnastyr, so trej mánge.

¹³Ne Léskiri godý na parudjola, kon saštý te riskirél Les Léskire droméstyr? Dová, so Léskiro di kaméla, kodová Jov i keréla.

¹⁴I Jov vypherdiakirdia dová, so isyn priphendlo mánge, i kadasavé priphenybená isyn but Léste.

¹⁵Paldavá mánde trašaibén ke meribén angíl Léste: syr me obduminava davá, tedy me darava Léstyr.

¹⁶Pal-dová so Devél kerdiá miro iló kovlo, i davá Jov, Sarezoralypnaskiro Devél, strahakirela man;

¹⁷syr Jov na čhurdyjá man te xasjovav angíl, syr javdiá kalypén, i Jov na garadia túga kalypnasa miré jakhéndyr.”