Read Biblija - Pe Baltitko Romani čib (Romanes) 2019 Baltic Romani Bible Ióvo 24 Bible Online

Ióvo 24 - Biblija - Pe Baltitko Romani čib (Romanes) 2019 Baltic Romani Bible bible

Ióvo 24

¹Sóske Sarezorjákiro Devél na uphendia časy te sendiakirél? Sóske kodolé, kon džinéla Les, na dykhéna Léskire dyvesá, so Jov vykedyjá vaš séndo?

²E manušá piričhuvena špery pe phuv te len butýr, jone nahrates zauhtylena bakréngire gurty i jone čaravena len ke pe.

³Jone tradéna zorjása ke pe pirotengire (sirotengire) oslen, jone léna pivliengire (udovengire) guruvén syr symadý (zalogo).

⁴Jone špulena (pihinena) bogen krig droméstyr: čororenge pe daja phuv trej te garadjon.

⁵Ake, jone isyn sýrby busa (dika) osly (miegárja) pe čhučé prahi, jone džána pe butý, i jone rodéna tasiárles (ránes) xabén: čhučé stiépi (malia) déna xabén lénge i léngire čhavorenge.

⁶Čororé čhinena telé na péskiro xahaiben pe félda, jone kedena vinagradýtka múri ke fuj manušá;

⁷jone rat'kirena nange, bi uribnaskiro, lénde nane sósa te čhakirenpe dre šyl.

⁸Jone kindjona bergitkone bryšyndendyr, i jone oblena skaly syr garavipnaskiri (ubiežyšča) péske.

⁹A kadalé fuj manušá otlena krig piroten (siroten) kolynestyr i jone léna symadý čororendyr:

¹⁰a kadalé čororé psiréna nange, bi idiakiro, i bokhalé, lydžána ĥarby (snopy);

¹¹jone tasavena olivítko dzet maškír vánty, i jone štavena vinagradýtka múri dro tasavil'nia (prieso) i jone menčynenape trušatyr (smegatyr).

¹²E manušá déna ĥondiá godlása foróstyr, i dukhade dijá godliakirena; — ne Devél na pričhinela bang fujé manušénge pal grehítka réndy.

¹³Odolé fujé-manušéndyr isyn kadasavé vérgi, kon buntuinena sýrby pe dud; jone na džinéna ni Léskire dromá, jone na jačénape pe drom dudesa (svietosa).

¹⁴Syr dyvesjola, uštéla zamaribnaskiro, jov muliakiréla čororen i bogen, a ratý jov čorela.

¹⁵Biladžakuneskire jakhá užakiréna bel'vél', phení péske: “Nijékh na dykhéla man”, i jov garavela péskiro muj.

¹⁶Dro kalypén jone podganavenape tel kherá, pe savé jone čhudé špéra dyvesé, jone na džinéna dud.

¹⁷Zlóko (ránko) isyn vaš lénge sýrby meribnaskiri zer (tien'), pal-dová so jone džinéna ratiakiri zer, saví na trašavela len.

¹⁸Tumé rakiréna! Jov, xači, isyn sýrby koterore pe paní, so valny (velny) sýges lydžána krig len, ne léngiri phuv isyn tel prokošybén (armania), i nijékh na risjola pe drom ke léngiri bar vinagradosa.

¹⁹Šut'kiriben i xačkiribén vyhala ivitka paniá, adiáke-pac' i liúno (prieispodnia) keréla kodolé manušénca, savé kerdé gréhi.

²⁰Dakiri ločoví (utroba) bistrela les, kirmo javéla te čaradjol léstyr: les butýr na javéna te ripirén manušá, i fuj manúš phadjola syr kašt.

²¹Pal-dová so jov pritasavela bičhavorengirja džuvliá, saví na bijanéla, i jov na keréla lačhipén pivliake (udovake).

²²Ne Devél tyrdela zoralypnaskire manušén Péskire zorjása, manúš ĥazdélape, ne nijékh manúš zoralés na patiála dro péskiro džiibén.

²³Devél déla lénge rakhiben, pe savó jone rozginena, ne Léskire jakhá dykhéna pe léngire dromá.

²⁴Jone ĥazdénape pe nabaró časo, tén'či jone našadjona. Tén'ci Devél čhuvéla len telé; jone džána krig droméstyr syr i javír manušá, jone vyšutjona syr giveskire šerore (kolosy).

²⁵Kóli na adiáke džála akaná, kon dophenéla, so me xohavava, i so miro rakiribén nisó nane mol?”