Read Biblija - Pe Baltitko Romani čib (Romanes) 2019 Baltic Romani Bible Ióvo 26 Bible Online

Ióvo 26 - Biblija - Pe Baltitko Romani čib (Romanes) 2019 Baltic Romani Bible bible

Ióvo 26

¹I otphendiá Ióvo lavénca:

²“Syr tu podyjan vast odoléske, konéste nane zor? Syr tu prirakhcian kodoleskiro vast, so izdrala?

³Syr tu dyján godý odoléske, savéste nany godypén? I syr pherdés tu podyjan zan i godý léske pal čačipén?

⁴Konéske tu vyphendian lavá? I konéskiro dúho (fáno) rakirdiá tyré ušténca?

⁵Riefaimy (mulé-manušéngire tieni) izdrana tel paní i saró, so dživéla odój.

⁶Liúno isyn psirado angíl Devléste, i Abadono nane učhakirdo Léskire jakhéndyr.

⁷Devél rozdind'kirela paš-ratiakiri rig pir čhučé štéty; Jov ublavela phuv pe nisó.

⁸Jov phandela khetané paní dre ĥensta óbloki, pharadjona paniéndyr,

⁹Jov čhudiá Péskiro trono, i Jov rosčhuvela Léskiro óbloko uprál pe léste.

¹⁰Jov otčertindia krugo pe panieskire jagóry, kaj kustýk (granica) maškír dud i kalypén.

¹¹Bolybnáskire stýlby izdrana, i jone daréna Léskire trašaibnastyr.

¹²Jov roskuniakirela paniá dro mórjo (derjáv) Péskire zorjása i Jov phagiréla pe koterá morjoskire (derjavéskire) drakonos Rahabos.

¹³Péskire duhósa Jov vyšukarjakirela bolybén i Léskiro vast prokurdia sygnone sapes.

¹⁴Ake, davá isyn jagóry Léskire dromendyr, i ame šunasa Léskiro lav adiáke nábut (kutý), sýrby lokho gundiakiriben! Ne kon saštý te ĥaljol Léskire-zoralypnaskiro grumo?”