Read Biblija - Pe Baltitko Romani čib (Romanes) 2019 Baltic Romani Bible Ióvo 27 Bible Online

Ióvo 27 - Biblija - Pe Baltitko Romani čib (Romanes) 2019 Baltic Romani Bible bible

Ióvo 27

¹I rakirdiá Ióvo duredýr péskiri pritča (masal) kadasavé lavénca:

²“Me sovlahava džidé Devlésa, Savó lyjá krig mándyr čačipén, i Jov Sarezorjákiro, Savó kirniakirdia miro di,

³adiáke ĥará (dlúges), paka miro dúho (fáno) isyn mánde i Devléskiro phurdypen džála miré ruthuniendyr (nozdriendyr),

⁴adákicy ĥará miré uštá na javéna te rakirén bibáht, i mirí čib na vyphenela xohaibén!

⁵Me som dur daléstyr, sob (kaj) me te čačakirav tumen, paka me som džidó, me na durjakirava péstyr miro bidošengiriben.

⁶Me rikirdjompe zoralés ke miro čačipén, i me na mekava davá péstyr: miro iló na bangiakirela man ni dro savó dyvés miré džiibnastyr.

⁷Mek te javél miré vergénge syr bibahtalenge, i kodoléske, kon ĥazdélape pe mánde, mek te javél léske, syr načačune manušénge.

⁸Pal-dová so savó lačhipén užakiréla fujemujengires, mek jov i te skedel but, kóli Devél otlela léstyr džiibén?

⁹Ci javéla te šunél Devél léskiri gódla, syr bari dar peréla pe léste?

¹⁰Ci javéla jov te radynélpe zoralés Sarezorjakire Devléstyr? Ci javéla jov usady (sak) te kharel Devlés?

¹¹Me javáva te sykliakirav tumen, so Devléskiro vast keréla, me na javáva te garavav tuméndyr Sarezoralypnaskire Devléskire dromá.

¹²Adiáke, tumé ž saré dykhné davá, sóske ž tumé vyphenena adákicy ivjá (darmes)?”

¹³“Kadasavi isyn fujé-manušéngiri dólia Devléstyr, i meknó mištypén Sarezorjakire Devléstyr, so doreséla odová manúš, kon pritasavela javirén:

¹⁴kóli but čhavoré javéna léste, tedy jone džána tel kurtála; i léskire palál-javibnaskire čhavé na javéna čale marésa,

¹⁵Kodolén, kon jačénape pal léste, len garavena pharé nasvalypnendyr, i léskire pivlia (udovy) na javéna te rovén pal lénde.

¹⁶Mek jov javéla te kedel rup syr práho, i mek jov te otčhuvel khetané ídi syr ĥleja (glina);

¹⁷jov prigotovinela davá, ne čačipnáskiro manúš javéla te ur'jel les; i bibangipnaskiro javéla te roskerél len.

¹⁸Jov čhuvéla kher syr mol', i syr rakhipnaskiro keréla péskiro kheroro (šalášo).

¹⁹Jov pasjola syr barvaló manúš, ne butýr jov na javéla kadasavó, jov otkerela jakhá, i nane ničý pašýl léste.

²⁰Trašaibén javéla naužakirdes pe léste, syr tasadyipnaskiro paning, baró štormo čorela les ratý.

²¹Vastočno balvál lydžála krig les, i sýrby riskiribnaskiri balvál jov riskiréla javrí les léskire štetóstyr.

²²I Devél čhurdelape pe léste bi tangipnaskiro, jov na déla ráda te našél Léskire vastéstyr.

²³Manušá javéna te marén dre vastá pe léste xoliamé radymátyr, i jone déna šolia pe léste krig léskire kheréstyr.”