Read Biblija - Pe Baltitko Romani čib (Romanes) 2019 Baltic Romani Bible Ióvo 28 Bible Online

Ióvo 28 - Biblija - Pe Baltitko Romani čib (Romanes) 2019 Baltic Romani Bible bible

Ióvo 28

¹“Tumé džinéna so isyn šahta vaš rup, i isyn štéto, kaj biliakirena suvnakái.

²Sastýr lélape phuvjátyr, i xarkóma (mied') biladjola (plavinelape) barestyr.

³Manúš xačkiréla jag dro kalypén, i jov pirirodela syr naj fedýr saró ke jagóry (kraí): bará dro kalypén, kaj isyn meribnaskiri zer (tien').

⁴Jov ganavela šahtytko ĥanýng krig manušéndyr: kaj Manušéskiro ĥerój bistrela, jone podublavena pes pe šele, jone kuninenape pe lénde upré i telé.

⁵Dre phuv barjola maró, ne phuv telé isyn sýrby piririskirdy jagása.

⁶Dre phuvjákire bará isyn but sapfiry i dre phuv isyn práho suvnakása.

⁷Nijékh riskiribnaskiri čirikly na džinéla dromore dre šahty, i koršunoskiri jakh na dykhciá davá.

⁸Phut'kirdé ščerá (lievy) na štade pir dová, i šakalo na psirdiá pir dová.

⁹Manúš čhuvéla péskiro vast pe kriemnitko bar, jov riskiréla bérgi upré fundamientenca.

¹⁰Jov čingirela angíl progiibena dre skaly, i léskiri jakh dykhéla kažno kuč bar.

¹¹Jov piričhakirela rekicy, sob (kaj) jone te na thaden, i jov lydžála pe dud (svéto) saró, so isyn garadó tel phuv.

¹²Ne kaj saštý te lathel godypén? I kaj saštý te sykljol, sob (kaj) xor te ĥaljol?

¹³Manúš na džinéla timín daleske, i godypén naštý te lathes pe phuv, kaj dživéna.

¹⁴Xor paniá rakiréna: “Mánde na lathesa godypén,” i mórjo (derjáv) rakiréla: “Mánde na lathesa godypén.”

¹⁵Godypén naštý te kines pal vykedyno suvnakái, ci te ublaves (te važynes) rup syr timín (cymin) pal godypén.

¹⁶Ne godypén naštý te des čol (timín) Ofisoskire suvnakása, kučoné oniksosa, ci sapfirosa.

¹⁷Ni suvnakái, ni kristalo naštý te roŭniakires ke godypén; adiáke-pac' i khoré (sasúdy) suvnakástyr.

¹⁸Pal mirikle (koraly) i mutin (žemčugo) i na rakiréna; adiáke syr i timín (cymin) pal godypén isyn kučedyr rubinendyr.

¹⁹Topazo Efiopijatyr naštý te roŭniakires ke godypén, adiáke-pac' i naštý te čhuvés timín pe godypén žužé suvnakása.

²⁰I, kaj saštý te lathes godypén? I kaj saštý te sykljos, sob (kaj) xor te ĥaljos?

²¹Davá isyn garadó manušéngire jakhéndyr, savé dživéna, davá garavelape čirikliendyr dro fáno (vozduho).

²²Has' i meribén rakiréna: “Ame šundiám dophenybén péskire kanenca.”

²³Devél ĥaljola drom ke godypén, Devél džinéla štéto te lathes godypén.

²⁴Pal-dová so Jov dykhéla phuv ke sama jagóry (koncy), i Léske bicialó saró, so isyn tel bolybén.

²⁵Syr Jov čhuvelas vieso balvaliake, i Jov vyginelas paniá mierasa,

²⁶i kiéli Jov čhuvelas statúto bryšyndeske i dromoro gromoskire bliskavicake;

²⁷to tén'či Jov dykhciá godypén i Jov phendiá statečnes; Jov začhudia godypén i Jov sprobindia godypén,

²⁸i phendiá Devél manušéske: “Ake, godypén isyn dro dová, sob (kaj) te dares Rástyr-Devléstyr, i ĥalyibén isyn dro dová, sob (kaj) te durjos bibahtalé rendéndyr.”