Read Biblija - Pe Baltitko Romani čib (Romanes) 2019 Baltic Romani Bible Ióvo 31 Bible Online

Ióvo 31 - Biblija - Pe Baltitko Romani čib (Romanes) 2019 Baltic Romani Bible bible

Ióvo 31

¹Me kerdjom zavieto miré jakhénca. Sóske tedy me javáva te dykháv pe terné patyvalé džuvliáte?

²Paldavá, saví javéla mirí dólia Devléstyr vučipnástyr, i, savó javéla mištypén Sarezorjakire Devléstyr, Savó isyn pe vučipená?

³Ci so, nane bari bída pe načačunende? Ci so, nane bibáht odolénge, kon keréla čoripén?

⁴Ci na dykhéla Jov miré dromá, ci na ginéla Jov miré šagi (lamnia)?

⁵Kóli psirdjom me načačune dromésa, kóli džálas sygedýr mirí ĥerój, sob (kaj) mánge te xohavav,

⁶to tedy mek te ublaven (te važynen) man pe roŭna ubladýtka (viesy), sob (kaj) Devél te moginel te džinél pal miro čačipén.

⁷Kóli miré piré (stópy) risiné krig droméstyr, cji, kóli miro iló gijá pal miré jakhá, ci kóli vari-saví doš prijacia ke miré vastá,

⁸to tedy mek mánge te čhuvav ziárka dre phuv, ne javireske te xal dová, so barjola, ci tén'či mek miro ródo te riskirén krig korniénca (rukhénca).

⁹Kóli vari-saví džuvlý te zaterdel miro iló, cji, kóli me te garadjovav paš miré-pašatuneskiro vudár,

¹⁰tedy, mek te del, sob (kaj) mirí romný te mielinel vaš javireske, i, sob (kaj) javír muršá te bandiakiren šeré angíl láte.

¹¹Pal-dová so davá javélas proštaviben (trašany doš ke kára), i davá isyn fuipén te sendinel sendariske.

¹²Pal-dová so davá javélas syr jag, saví xalas saró ke xas', i saví riskirelas krig rukhénca (korniénca) saró miro mištypén.

¹³Kóli me dykhávas vučipnása pe miré-štubakire dynariste ci dynaricate, kiéli jone lydžiné čingárd mánca;

¹⁴so ž tedy treindiá mánge te keráv, kiéli Devél léla te sendinel? I kóli Jov phučela mándyr, so ž tedy mánge javélas te otphenav Léske?

¹⁵Ci odová, Kon sozdyjá man dre dakiri loč, ci na Jov sozdyjá kodolé pishar'jén? Ci na Jov vysozdyja dujén dre loč?

¹⁶Kóli me na davas dová, so čororé kamenas, ci kóli me keravas adiáke, so pivliengire (udovengire) jakhá občhuvenaspe jasvénca;

¹⁷ci kóli me xavas kokoró miro kotér, i sob (kaj) piroto (sirota) te na xal mánca; —

¹⁸pal-dová so piroto miré ternypnastyr barija paš mánde, syr paš dadéste, i me lydžavas pir džiibén adalia pivlia, syr féni me vygijom dákire ločatyr,

¹⁹ci kóli me dykhávas, so vari-kon xasjolas pir dová, so na sys léste so te ur'jel, ci čorores, konéste na sys sósa te učhakirelpe;

²⁰ci kóli léskiro trušúl na bahtiakirdiá man, i ci miré-bakrengiri výlna (šers') na tat'kirdia les,

²¹ci kóli me ĥazdavas péskiro vast pe pirotoste, mek me i dykhávas miré manušén paš pórta,

²²tedy mek te perél krig miro vast miré psikestyr, mek te riskirdjol javrí miro vast kokalostyr.

²³Pal-dová so xas' Devléstyr zoralés trašakirelas man, i pir dová me na moginavas te vyrikirav Léskiro fedyripen.

²⁴Ci, kóli me te užakirav lačhipén suvnakástyr, cji, kóli me te phenáv vykedyné suvnakaske: “Dre túte me zoralés patiáva.”

²⁵Ci, kóli me drieván te radynavpe doléstyr, so me sómas drieván barvaló, ci pir dová, so miro vast doresciá but;

²⁶cji, kóli me te dykháv putrade jakhénca pe kham, syr jov délas dud, ci pe čhon, syr jov džal štetóstyr pe štéto pir bolybén, ziaindoj,

²⁷i kóli kham i čhon čorahanés te zatyrden miro iló, cji, kóli me te čamudav péskiro vast sýrby te dav patýv léske;

²⁸tedy davá adeke-pac' javélas čoripén, so isyn mol pe séndo; pir dová, so me tedy sýrby otphenavaspe Devléstyr, Savó isyn pe vučipén.

²⁹Kóli me te radynavpe zoralés, so xasibén pyjá pe léste, cji, kóli me te ĥazdavpe radymátyr, syr bibáht pyjá pe léste;

³⁰cji, kóli, čačipnása, me te menčynav miro muj te phenél grého, cji, sob (kaj) me kamamas prokošybén (armania) pe léskiro di;

³¹cji, kóli te phenén manušá miré šatratyr: “Ci isyn vari-kon, savó na xaja čalés léskiro mas?”

³²cji, kóli vari-savó čúžo manúš te rat'kirel pe vulíca (gása), cji, kóli me te na psiravav miré vudará dromeskireske (prohožoneske);

³³kóli, me te čhakirav miré čoré réndy syr Adamo, garavi miro čoripén pal brek,

³⁴pal-dová so me daravavas manušéngire skopostyr, i sem'iengiro nakutiakiriben ke me trašavelas man, tedy me javavas štyl, i me na džavas javrí pal vudár.

³⁵O, kóli te javél vari-kon mánde te šunél man! Ĥáda, isyn miro podčhinyben: mek Sarezorjákiro Devél te otphenel mánge! I sob (kaj) miro proti — terdypnaskiro manúš te čhinel miro band'kiriben!

³⁶Čačipnása, me lydžavas davá band'kiriben pe miro psikó; i me phandavas les pe šeró syr kralítko stadyk;

³⁷me pridžinavaspe Devléske pal kažno miro šago (lamny), me sýrby thagári džavas pašedyr ke Jov.

³⁸Kóli mirí phuv te del gódla pe mánde, i kóli lákire lies'ni (borozdy) te rovén khetané pe mánde,

³⁹kóli me xajom lákire barjakirdé (plódy) bilovengiro, i kóli me menčyndjom ke meribén dijá, konéskiri phuv daja sys,

⁴⁰to mek te barjon kanrale rasliny pe giveskiro štéto, i mek te barjol dylyny čar (kukol') pe ĥerstoskiro (jačmienjoskiro) štéto (Iovoskire lavá končyndlepe).