Read Biblija - Pe Baltitko Romani čib (Romanes) 2019 Baltic Romani Bible Ióvo 32 Bible Online

Ióvo 32 - Biblija - Pe Baltitko Romani čib (Romanes) 2019 Baltic Romani Bible bible

Ióvo 32

¹I kadalé trin manušá pirijačne te otphenen Iovoske, pal-dová so Jov sys čačunó dre péskire jakhá.

²Tén'ci zahačíia Eliujoskiri xolý, kon sys Varahoskiro čhavó Vuzitendyr, savé isyn Ramoskire sem'iatyr: léskiri xolý zahačíia pe Iovoste; pal-dová so jov čačakirdia pes butýr Devléstyr.

³Léskiri xolý roshačija adiáke-pac' pe triné malende, pal-dová so lénde nisó na sys te otphenen, i so jone sendindle zoralés les.

⁴Ne, Eliujo (Eliujo), Varahoskiro čhavó, užakirdia, paló dová, syr Ióvo končyndia te rakirél, pal-dová so léskire trin malá sys phuredýr léstyr.

⁵I dykhciá Eliujo, so na sys lav dre léngire muiá adalé triné manušénde, to léskiri xolý roshačija butýr.

⁶I Eliujo, Varahoskiro čhavó Vuzitendyr, otphendiá lavénca: “Me som ternó, ne tumé san dre beršá, paldová me sómas ladžakuno, i me darandyjom te sykavav, so me džinóm.”

⁷Me phendjom: “Mek dyvesá te rakirén, i beršengiro butypen te sykliakirél godypnaske.”

⁸Ne dre manušéste isyn dúho (fáno), savó déla Sarezorjákiro Devél, Savó déla godý manušénge te ĥaljol.

⁹Na baré-beršengire manušá isyn ŭsády (sak) naj godedyr, adiáke-pac', i manúš dre beršá na ŭsády (sak) ĥaljola čačipén.

¹⁰Paldavá me phenáva: “Šunén man mištés, me adiáke-pac' sykaváva, so me džinóm.

¹¹Ake, — me užakirdjom tumaré lavá, me šundjom otkerde kanesa pričyny, so tumé pirirakirenas, syr akaná tumé rodenas, so te phenén.

¹²Čačó, me riskirdjom iló ke tumaré lavá, i, ake; nijékh tuméndyr na piripatiakirela Iovos, i nijékh na otphendiá pe léskire lavá, —

¹³tedy tumé na rakirén: “Ame lathiam godypén. Devél otphenéla, syr trej Léske, ne na manúš.

¹⁴Ióvo na rakirdiá péskire lavá mamúj ke me, i me na otphenavas léske tumaré lavénca.

¹⁵Tumé akaná xokine divostyr, i na otphenena nisó; tuménde i lavá xasiné.

¹⁶I me užakirdjom, pal-dová so tumé na rakirdé, ne tumé sánas štyl, i tumé butýr na otphendlé.

¹⁷I akaná me adiáke-pac' otphenava miré rigátyr:

¹⁸pal-dová so mánde isyn pherdó lavá, dúho (fáno) andrál mánde začhuvela man te rakiráv.

¹⁹Ĥáda, saró andrál mánde isyn syr mol (vino), saví isyn naotphandly, saví, ake, akaná pharadjola.

²⁰Me javáva te rakiráv, sob (kaj) mánge te javél lokhedýr, me otphandava péskiro muj i me otphenava.

²¹Me mangavape Devléske, sob (kaj) mánge te na javav pe vari-konéskiri rig, i sob (kaj) mánge te na xohavav gudles vari-konés.

²²Pal-dová so me na džinóm, syr te xohavav gudles; kóli me te keráv adiáke, to miro Sozdyibnaskiro ukedela krig man.”