Read Biblija - Pe Baltitko Romani čib (Romanes) 2019 Baltic Romani Bible Ióvo 33 Bible Online

Ióvo 33 - Biblija - Pe Baltitko Romani čib (Romanes) 2019 Baltic Romani Bible bible

Ióvo 33

¹Ne me mangáva tut, Ióvo, šun, so me phenáva túke, i prišunpe mištés ke saré miré lavá.

²Ĥáda, akaná, me otphandava péskiro muj, mirí čib javéla rakirél dro miro muj.

³Miré lavá džána miré-iléskire čačipnastyr, i miré uštá vyphenena jekh džinybén.

⁴Devléskiro Dúho sozdyjá man, i Sarezorjakirere Devléskiro phurdypen dyjá džiibén mánge.

⁵Kóli tu naštý te otphenes mánge, phen péskire lavá jekh, pal javír angíl mánde: terdjov angíl mánde.

⁶Ake, me som dasavo-pac' angíl Devléste syr tu, me adiáke-pac' som sozdynó prahostyr.

⁷Šun, na andarša (na dar) miré minatyr, i miré vastéstyr, so javéla pharó túke.

⁸Ĥáda, so miré kaná šundlé, i me šundjom tyré-lavengiri zan:

⁹“Me som bidošéngiro, me na kerdjom čoripén.

¹⁰Ne Devél lathéla bang dre mánde, Jov ginéla man pal Léskire vergoste,

¹¹Jov čhuvéla miré ĥerá dre kalodki, Jov dykhéla pal saré miré dromá!”

¹²Dykh! Dro davá tu na san čačikano (opravdano), — me phenáva túke: Devél isyn vučedýr manušéstyr.

¹³Sóske tu lydžása čingárd Lésa? Jov, xaj, na déla otphenybén pal Léskire réndy!

¹⁴Pal-dová so Devél rakiréla jékhvar, duj móly, ne manúš na ĥaljola angíl;

¹⁵Devél sýrby phenéla dro sunó, dre zdanki (dykhibén) ratý, syr xor soiben peréla pe manušéste, ci syr manúš lindrela (drieminela) pe čhuibén,

¹⁶tedy Devél otphandela manušéngire kaná i Jov čhuvéla sýrby jakhítko pe Péskiro uphenybén,

¹⁷sob (kaj) te obrikirel manušés te kerél čoré réndy, sob (kaj) te garavel phut'kiribén manušéstyr.

¹⁸Jov rakhéla Manušéskiro di maĥilatyr, i léskiro džiibén kurtalátyr.

¹⁹Devél adiáke-pac' pirisykliakirela manušés nasvalypnasa dro léskiro čhuibén, i zoralé dukhasa dre léskire but kokalý adiáke,

²⁰so léste butýr nane kamiben te xal maró, i léskiro di butýr na kaméla smašno xabén.

²¹Léskire masá xasjona pe jakhá, i léskire kokalý, so na dykhné sygedýr, akaná biciale javrí.

²²I léskiro di džála pašedyr ke mulytko ĥanbín, i léskiro džiibén ke meribén.

²³Kóli te javél bičhaibnaskiro Jangólo vaš léske, manúš, kon rozlela godiása, jekh tysjoncendyr, sob (kaj) te sykavél adalé manušéske léskiro mamúj drom,

²⁴tén'či Devél potanginela manušés i phenéla: “Vyrakh les, sob (kaj) jov te na džal dre maĥila (kula); Me lathjom vykinybén pal léste.”

²⁵Léskire masá javéna zoraledýr syr dre léskire terné beršá, jov sýrby risjola tedy ke léskire terné beršá.

²⁶Jov javéla te mangélpe Devléske, i Devél priléla les laskasa, i jov javéla te del patýv angíl Léste baré radymása, pal-dová so Devél riskiréla pale léskiro čačipén.

²⁷Jov javéla te dykhél pe javire manušénde, i te rakirél: “Me kerdjom gréhi, i me piririskirdjom čačipén. I me na dorescjom dab pale.

²⁸Devél vyrakhcia miro di mulytkone ĥanbinatyr, i miro džiibén udykhéla dud!”

²⁹Ake, Devél keréla saró davá duj trin móly manušésa,

³⁰sob (kaj) te janel pale Manušéskiro di maĥilatyr (kulatyr), sob (kaj) te obsvencynel les džiibnáskire dudesa (svetosa).

³¹Dykh mištés, Ióvo, šun otkerde kanenca man, jav štyl, i me javáva te rakiráv.

³²Kóli isyn vari-so túte te phenés, to otphen mánge: rákir, pal-dová so me drieván kamám te čačakirav (te opravdynav) tut.

³³Kóli nad, tedy šun man: jav štyl, i me javáva te sykliakirav tut godypnaske.”