Read Biblija - Pe Baltitko Romani čib (Romanes) 2019 Baltic Romani Bible Ióvo 34 Bible Online

Ióvo 34 - Biblija - Pe Baltitko Romani čib (Romanes) 2019 Baltic Romani Bible bible

Ióvo 34

¹I otphenélas Eliujo (Eliujo) duredýr i phendiá:

²“Šunén miré lavá tumé, kon san godé; pričhuvén kan ke me, tumé, kon džinéla but.

³Pal-dová so kan sprobinela lavá, syr taloj (gortan') koštynela xabén.

⁴Javén, vykedasa péske čačipén; javén, džinása butýr khetané, so isyn lačhipén.

⁵Pal-dová so Ióvo phendiá: “Me som čačunó, ne Devél lyjá krig miro čačipén.”

⁶So ž mánge te xohavav pe miro čačipén? Mirí dab (rana) na sastija, mek me i som bičoripnaskiro.

⁷Kaj isyn dasavo manúš syr Ióvo isyn? Kon p'jela xoliamipen sýrby jov p'jela paní?

⁸I kon kumplinelape adasavé manušénca, kon keréla čoripén, i kon psiréla fujé manušénca?

⁹Pal-dová so jov phendiá: “Nane lačhipén manušéske, so jov zoralés radynélape Devléstyr.”

¹⁰Paldavá šunén mištés man, tumé, kon san godé: naštý te javél, sob (kaj) Devél te duminel, te kerél fuipén, i naštý te javél čoripén Sarezorjakire Devléstyr.

¹¹Pal-dová so Jov otdéla pale manušéske pir léskiri butý, sob (kaj) kažno manúš te doresel mazúri (nagrada) pir dová, so Jov kerdiá.

¹²Saré džinéna, so Devél nijékhvar na keréla fuipén, i Sarezorjákiro Devél na piririskirela čačipén.

¹³Kon dyjá zor dre Léskiri vastá pe sarí phuv? Nikón ža i dyjá zor Léske te rainel pe saró svéto.

¹⁴Kóli Jov féni te duminel pal Péste, i te kedel krig Péskiro Dúho (Fáno) i Péskiro phurdypen te dživén;

¹⁵to saró džidó xasjolas, i manúš risjolas dro práho.

¹⁶Kóli tumé san godé, šunén davá; prišunenpe ke miré-lavengire zaniá (glosiá):

¹⁷“Ci saštý te rainel odová, kon zoralés na kaméla čačipén? Ci saštý tu te obsendiakires zoralés kodolés, Kon isyn Sarečačipnaskiro?

¹⁸Ci isyn lačhés te phenél kralíske: “Tu san zlydnia!” Ci lačhé-rodoskire ráske: “Tu san bibáht.”

¹⁹Devél na priléla thagar'jengiri rig, adiáke-pac' Jov na ginéla barvalen vučedýr čororendyr, pal-dová so Jov sozdyjá i jekhés i javirés.

²⁰Ĥáda, jone meréna i dre paš-rat, i manušá izdrana i xasjona, i zoralypnaskire muršá pirijačena te javén dro svéto bimanušeskire-vasteskiro.

²¹Pal-dová so Devléskire jakhá isyn pe dromá, savénca manúš psiréla, i Jov dykhéla saré léskire šagi (lamnia).

²²Ni dro kalypén (ciamlypén), ni dre meribnaskiri zer (tien') naštý te garadjon Devléstyr manušá, kon keréla čoripén.

²³Devléske na trej, sob (kaj) manúš te obduminel, syr léske te terdjol pe séndo angíl Raste-Devléste.

²⁴Jov phagela pe koterá zoralypnaskire muršén, i Jov čhuvéla javire manušén pe léngire štéty.

²⁵Davá isyn čačipén, so Devél džinéla léngire réndy, Jov ravela telé len ratý, adiáke, so jone xasiné.

²⁶Jov pekavela len syr fujé manušén angíl javire-manušéngire jakhá,

²⁷pal-dová so jone risiné pale Léstyr, i jone na obduminenas Léskire dromá ke dasaví miéra.

²⁸Pal-dová so čororé-manušéngire roibén dogijá ke Jov, pal-dová so Jov šunéla, syr pritasade manušá rovena.

²⁹Kóli Jov isyn štyl, kon tedy saštý te kerél šumo? I kóli Jov ĥaravela Péskiro muj, tedy, kon saštý te dykhél Les? Ci te javél davá vaš sarí nacyja, ci vaš jekhe manušéske?

³⁰sob (kaj) te na rainen duje-mujengire manušá, sob (kaj) te na javén manušá xohade syr feliasa.

³¹Ci phendián tu, Ióvo, syr i javír manúš Devléske: me na javáva butýr te keráv gréhi!

³²So me na dykháva, daleske sykliákir man; kóli me kerdjom načačunes, me na javáva butýr.

³³Ci javéla Devél te otdél pale pir tyrí godý? Pal-dová so tu otphendianpe Léskire sendostyr!? Davá túke trej te vykedes, na mánge, phen akaná aménge, syr tu džinésa.

³⁴God'varé, i godé manušá phenéna mánge, savé šunéna man:

³⁵“Ióvo phendiá adiáke, syr léste nane džinybén, léskire lavá isyn nagode.”

³⁶O, sob (kaj) Ióvo te javél piriprobindlo ke kónco (jagóro)! Pal-dová so jov otphendiá adiáke, syr fuj manušá!

³⁷Pal-dová so Jov dočhuvela búnto pe Devléste ke léskire gréhi, jov marela dre vastá maškír aménde i jov butedyrjakirela péskire lavá pe Devléste.”