Read Biblija - Pe Baltitko Romani čib (Romanes) 2019 Baltic Romani Bible Ióvo 36 Bible Online

Ióvo 36 - Biblija - Pe Baltitko Romani čib (Romanes) 2019 Baltic Romani Bible bible

Ióvo 36

¹I nevéstyr lyjá te phenél lav Eliujo (Eliujo) i phendiá:

²“Vyrikir (potierpin) man nábut i pošun, i me sykaváva túke, so mánde iščo (inké) isyn lavá Devléskire rigátyr.

³Me sýrby janáva miro džinybén duripnastyr, i me dosykavava čačipén pal miré Sozdyibnaskireste.

⁴Pal-dová so, čačipnása, miré lavá isyn na xohané; i angíl túte isyn murš, kon isyn bidošéngiro dro džinybén.

⁵Ake, Devél isyn zoralypnaskiro, ne Jov na dykhéla bipatyvakires ni pe konéste. Jov isyn drieván zoralypnaskiro, i Jov isyn drieván baré-godiákiro.

⁶Jov na rakhéla bibahtalé-manušéngiro džiibén, ne Jov keréla pir čačipén kodolenca, konés pritasavéna.

⁷Jov na riskiréla krig Péskire jakhá čačuné manušéndyr, ne jone isyn pe trono kral'jenca, pal-dová so Jov bešliakirela len pe ŭsády (sak), i lénge déna bari čol (timín).

⁸I kóli jone isyn phandle dre sastyrá, i len rikiréna i pritasavéna sýrby šelenca;

⁹to tedy Devél sykavéla léngiri bibáht, i léngiro čoripén, pal-dová so jone kerdé len but;

¹⁰tén'či Jov otphandela léngiro kan te sykliakirél len, i Jov priphenela lénge, sob (kaj) jone te risjon čoripnástyr.

¹¹Kóli jone prišunenape i javéna te dynarinén Léske, léngiro džiibén javéla dro mištypén, i léngire beršá prodžána dre rádyma (loš).

¹²Ne kóli jone na javéna te kandén, tedy jone xasjona kurtalátyr, i jone meréna dro nadžinyben.

¹³Ne fujé-mujengire manušá skedéna xolý dro iló; jone godlena jasvénca, kiéli Devél phandela len dre sastyrá.

¹⁴Jone meréna terné, i léngiro džiibén končynelape maškír nadevlytkone manušénde.

¹⁵Devél vyterdela čororé manušés men'kendyr, i Jov otphandela jakhá lénge, kiéli len pritasavéna.

¹⁶Jov adiáke-pac' vytyrdelas i tut darakune bibahtiatyr, pe buĥló štéto, kaj javéla vól'no; i dová, so isyn čhudo pe skamínd, javéla pherdó thule xabnasa.

¹⁷Ne akaná pherdó séndo pyjá pe túte, so isyn vaš fujé manušénge, Ióvo, — séndo i čačipén rikiréna tut.

¹⁸Mek Devléskiri xolý te na marel tut telé jekhe pekaibnasa; pal-dová so baró myto na zrakhéla tut.

¹⁹Ci déla patýv Devél tyré barvalypnaske? Nad, — ni suvnakaske, ni savé kučipnaske.

²⁰Na kam zoralés doiá rat, syr manušá, xasjona pe péskire štéty.

²¹Rikirpe na risjov ke čoripén, pal-dová so ž tu ĥaredyr vykedyjan čoripén péske syr te stradynes.

²²Ake, Devél isyn drieván baró pir Péskiri zor! Kon sykliakiréla amen syr Jov?

²³Kon dyjá léske réndo adiáke te kerél? Ci kon phendiá: “Tu kerdián namištes?

²⁴Rípir te barjakires Léskiri butý, pal saví manušá bagana.

²⁵Kažno manúš dykhciá davá, ne manúš saštý te dykhél pe Léskiri butý duripnastyr.

²⁶Ake, Devél isyn drieván baró, i ame naštý te ĥaljovas xor Les, adiáke-pac' naštý te phenés Léskire beršá.

²⁷Gada, Jov skedéla kapli (čolynia) paniésa, savé pirikerenape dro bryšýnd miglatyr;

²⁸savé óbloki mekéna telé i čhuvéna drieván but pe kažnoné manušéste.

²⁹Čačó, ci moginéla vari-kon te ĥaljol, syr Devél rozdind'kirela bolybena, ci syr lélape bliskavica Léskire garadé šatratyr?

³⁰Dykh, Ióvo, syr Jov rozčhurdela Péskiro dud pe láte, i Jov učhakiréla morjoskiro (derjavéskiro) dugno (dno).

³¹Odothýr Jov sendiakiréla manušýtka nácyi; Jov déla xabén drieván but.

³²Jov garavela bliskavica dre Péskire vastá, i Jov priphenela láke, kaj te pekaven.

³³Ne gromo podela zan, so javala bliskavica, adiáke-pac' i kheritkoné murdalengiro (skotoskiro) iló šunéla; syr joj iavéla.