Read Biblija - Pe Baltitko Romani čib (Romanes) 2019 Baltic Romani Bible Ióvo 38 Bible Online

Ióvo 38 - Biblija - Pe Baltitko Romani čib (Romanes) 2019 Baltic Romani Bible bible

Ióvo 38

¹I otphendiá Raj Devél Iovoske riskiribnáskire balvaliatyr (buriatyr) lavénca:

²“Kon isyn kadavá, kon kaliakirela Miré zadumy nagod'vare lavénca?

³Podphandepe i jav skedynó, Ióvo, syr murš, i Me javáva te phučav tútyr, tu javésa te otphenes Mánge.

⁴Kaj sánas tu, syr me začhuvavas phuv? Phen Mánge, kóli tu san baré-godiákiro?

⁵Kon priphendiá baripén phuvjake? Ci džinésa tu davá? I kon rozdindkirdia pe láte šelo te mierinel?

⁶Ke so phuvjákiro fundámiento pričhudo zorjása? I kon čhudiá lákiro venglytko bar;

⁷kiéli bagandle khetané čergeniá pe zlóko (pe ránko), i saré Devléskire čhavé dénas gódla radymátyr?

⁸Ci kon zaphandia mórjo (derjáv) vudarenca, kiéli jov pharadjolas baré paningesa, sýrby jov džálas javrí ločatyr;

⁹kiéli me kerdjom oblokendyr léske ídi i pherdé cjomnymatyr pat'kiribnaskire pherne (pieljonki).

¹⁰Kiéli me čhudjom mirí miéra morjoske, i kiéli me čhudjom štaby i vudará;

¹¹kiéli me phendjom: ‘Féni adiáke dur túke saštý te džas, ne, na duredýr, i adáj tyré phut'kirdé valny isyn bangé te terdjon.’

¹²Ci priphenesas tu zlokoske (rankoske), syr tu lyjan te dživés, i ci keresas tu adiáke, sob (kaj) ránko te džinél péskiro štéto,

¹³sob (kaj) zlokoskiro dud te dodžal ke phuvjákire jagóry, i, sob (kaj) fujé manušén te trinskiren látyr,

¹⁴sob (kaj) joi, phuv, te risjol syr ĥleja tel jakhítko (piečat'), i sob (kaj) joj te paruvel péskiri mastin (cviato) syr ídia,

¹⁵te pririkirel dud angíl fujé manušénde, i sob (kaj) te phagirel ĥazdynó vast.

¹⁶Ci sánas tu adiáke dur, kaj morjoskire (derjavéskire) ĥaningore lenape? Ci psirdian tu pir morjoskiro (derjavéskiro) dugno te rozĥaljos xoripén?

¹⁷Ci psiradiape angíl túte meribnaskiri pórta? Ci dykhcián tu vudár ke meribnaskiri zer (tien')?

¹⁸Ci ĥalyjan tu xor phuvjákiro buĥlypén? Phen zoralés Mánge, kóli tu džinésa saró davá?

¹⁹Kaj isyn drom ke štéto, katýr dud džála? I kaj ciamlypén jačélape,

²⁰sob (kaj) tu moginesas te lydžas len ke léngire kustyka (granicy), i te bičhaves len ke léngire kherá?

²¹Ci džinésa tu davá, pal-dová so tedy tu uže sánas pe svéto, ci pal-dová so túte isyn baré beršá pir dyvesá?

²²Ci sánas tu vari-kiéli odój, kaj isyn piralý vaš iv? Ci dykhcián tu piralý vaš grado,

²³so Me rakhcjom vaš davá časo (cýro); syr javéla pharipén, syr javéna dyvesá vaš maribén i vojna?

²⁴Save dromésa dud (svéto) roskerelape pe pašá, ci balvál vastokóstyr (bel'velitkonestyr) rozurnialape pir phuv?

²⁵Kon keréla drom baré paningeske te čhuvelpe duredýr, ci kon sykadiá drom vaš gromoskiri bliskavica?

²⁶Ci kon keréla adiáke, sob (kaj) te džal bryšýnd pe phuv, kaj nikón nane, pe čhučí phuv, kaj nane manušés,

²⁷sob (kaj) te paniakirel ke čalypen naobdživdle štéty, i te kerél adiáke, sob (kaj) čarinki te barjon ke ĥensto čar.

²⁸Ci isyn bryšyndeskiro dad? Ci kon jandiá pe svéto pahlyniakire (rosakire) kapki?

²⁹Dre konéskiri loč (črievo) lathelape ljodo? I kon jandiá mrazo pe svéto?

³⁰Paniá kerénape sýrby bará, i saró panieskiro buĥlypén, kaj isyn xor telál, mrazjola dro jekh kova?

³¹Ci moginésa tu te phandes čergengiro riado, so kharélape Plejady, i ci moginésa tu te rosphandes vol'nedyr Orionoskire-čergeniengiri kustýk?

³²Ci moginésa tu te lydžas angíl čergeniengiro zodiako dro péskiro časo (cýro), i ci moginésa tu te lydžas ričyha ričorenca?

³³Ci džinésa tu bolybnáskire — statutno uphenybén? Ci moginésa tu te čhuvés les te rainel pe phuv?

³⁴Ci moginésa tu te ĥazdes péskiri zan ke bolybén, sob (kaj) but — but paniá te čhakiren tut?

³⁵Ci désa ráda tu te bičhaves bliskavícy, sob (kaj) jone te džán, i sob (kaj) jone te phenén túke: “Ake, ame sam.”

³⁶Kon dyjá godypén manušéskire godiake? I kon dyjá god'varipen ileske.

³⁷Kon déla ráda te poginel óbloki péskire godypnasa? Ci, kon déla ráda, sob (kaj) óbloki te vyčhuven paniá bolybnástyr sýrby gonestyr,

³⁸kiéli práho kerdiápe dre tvarda komki, a phuvjákire koterá lipnindlepe khetané.

³⁹Ci tu, Ióvo, staresa vaš ščericake (l'vicake), sob (kaj) joj te riskirél vari-so dandenca, ci tu désa čalés xabén terné ščerorenge?

⁴⁰kiéli jone podčorjona dre péskire venty (logovy), ci podrakhena, pasindoj, vari-so dre léngire čorahane štéty (zasady)?

⁴¹Kon doreséla xabén korakoske (voronoske), kiéli léskire čhavrinia (ptiency) godlena ke Devél i psiréna trusciál pir dová, so lénde nane mas.