Read Biblija - Pe Baltitko Romani čib (Romanes) 2019 Baltic Romani Bible Ióvo 39 Bible Online

Ióvo 39 - Biblija - Pe Baltitko Romani čib (Romanes) 2019 Baltic Romani Bible bible

Ióvo 39

¹Ci džinésa tu časo (cýro) kiéli busa bergitka buznia (kozy) lot'kirena tyknen? Ci désa ráda tu te dykhés, kiéli mirgi (lani) lot'kirena?

²Ci moginésa tu te pogines, kicý čhoná jone isyn pharé tyknenca? Ci džinésa tu časo, kiéli mirgi daja lot'kirena len?

³Jone vybandjona, kiéli jone lot'kirena: jone čhurdena javrí péskire dukhá péskire palál-javibnaskirenca (patomkenca).

⁴Léngire terné isyn zoralé, jone barjona pe giv, jone udžana, i jone na risjona ke jone.

⁵Kon vymekcia pe vólia busone (dikone) oslós? Kon rosphandia pienty onageroske?

⁶Kon léske kerdiá kher čhučé phuvjátyr, i džiibnytko štéto londe šteténdyr?

⁷Adavá murdál dykhéla vučipnástyr pe foróskiri gódla, jov na šunéla, so pe léste déla gódla potradypnaskiro.

⁸Jov čaradjola pe sama vučipená pe bérgi, jov rodéla kažno zelenyben.

⁹Ci zakaméla leskaro guruv te dynarinél túke? Ci javéla jov te rat'kirel pašýl tyrí jasla?

¹⁰Ci désa ráda tu šelenca te priphandes busone guruvés ke liés'ni (borozny)? Ci javéla jov te pharavel phuv pal túte?

¹¹Ci javésa tu te dopatias léske, pal-dová so léste isyn bari zor? Ci mekesa tu pe léste péskiri butý?

¹²Ci dopatiasa tu léske, sob (kaj) jov te janel kheré tyró giv? I, sob (kaj) jov te skedel giv dre tyrí šúrna (gumno)?

¹³Strausica marela péskire phakenca radymátyr, ne láte nane adasavé phaká i šukár pora syr pavlinoste,

¹⁴joj jačkiréla péskire parnore pe phuv, i joj tat'kirela len pe phuv.

¹⁵Joj bistrela, so ĥerój moginéla te tasavel len, cji, so feldytko murdál (zviérjo) moginéla te phagirel len.

¹⁶Strausica pharjakirela péskiro iló ke lákire tykné, sýrby jone isyn na lákire, joj na daréla, so lákire pharé butiá isyn ivjá.

¹⁷Pal-dová so davá Me, Devél, lyjom krig godypén látyr, i me na dyjom godý láke.

¹⁸Kiéli joj ĥazdélape vučés, joj dykhéla vučipnása pe greste, i pe manušéste, kon isyn uklisto pe greste.

¹⁹Ci davá tu, Ióvo, dyján zor greske i uridian griva pe léskiri Men?

²⁰Ci moginésa tu te zatrašaves gres syr skočkos? Jov adiáke daranes fyrskinela, so ĥazdéla traš.

²¹Jov ĥanavela kopytenca phuv i drieván radynélape péskire zorjátyr; jov prastala ĥaloposa odorík, kaj manušá zdžanape mardytkonenca (oružyjosa).

²²Jov sýrby salape, i na džinéla dar; jov na ĥaljola traš, jov na risjola pale kurtalátyr;

²³kolčano briazginela scial léste, maribnýtko bust i čhur'je — čhurdypnytko (drotiko) ziainena angíl.

²⁴Jov nakhavela phuv sýges i xoliása, i jov na moginéla te terdjol pe štéto, kiéli jov šunéla rógo (truba).

²⁵Syr rógo zabašavela, graj déla zan “Aga”; jov sungavela maribén duripnastyr, syr rajo déna gódla zoralé zanienca (zanienca).

²⁶Ci tyré godypnastyr kagniengiro (jastriebo) vurniala, i rozdind'kirela péskire phaká ke paš-dyvesýtko rig?

²⁷Ci tyré lavéstyr ĥazdélape mamúj upré (órlo) kído i keréla péskiri ĥniazda pe vučipén?

²⁸Jov dživéla pe skaly i jov rat'kirela pe skalengire vostrime, štéty, so na dodžasa,

²⁹odothýr jov vyrodela so te riskirél dandenca; jov čhuvéla péskire jakhá pe vari-so duripnastyr;

³⁰i léskire tyknore p'jena rat; — kaj isyn mulypen, odój isyn léskire tyknore.”

³¹[40.1-ju.o.] I otphendiá duredýr Raj Devél Iovoske dasavé lavénca:

³²[2] “Ci javéla odová manúš, kon lydžála čingárd Sarezorjakire Devlésa, te pirisykliakirel Les? Mek jov, kon bangiakirela Devlés, te otphenel Léske!”

³³[3] I otphendiá Ióvo Ráske-Devléske i rakirdiá:

³⁴[4] “Dykhén me som telatuno, so mánge te otphenav Túke? Me čhuváva miro vast pe uštá.

³⁵[5] Me jekh mólo phendjom, ne me na javáva te otphenav akaná: čačó, javír mólo, ne me butýr na javáva te rakiráv.