Read Biblija - Pe Baltitko Romani čib (Romanes) 2019 Baltic Romani Bible Ióvo 42 Bible Online

Ióvo 42 - Biblija - Pe Baltitko Romani čib (Romanes) 2019 Baltic Romani Bible bible

Ióvo 42

¹I otphendiá Ióvo Ráske-Devléske kadasavé lavénca:

²“Me džinóm, so tu moginésa saró te kerés, i nane nisó, sob (kaj) te obrikirel Tut te kerés dová, so Tu obdumindian.”

³Tu phucian: “Kon isyn kadavá, savó ciemniakirela Miré lavá bigodypnasa?” Ne me phendjom davá, so me na ĥalyjom. Saré dalé lavá isyn dívna vaš mánge, savé me na džindjom.

⁴Šun, Dévla, me mangáva Tut, de te phenáv mánge, Tu phendián: “Me javáva te phučav tútyr, ne Tu javésa te ĥaliakires mánge.”

⁵Me šundjom pal túte, so féni javír miré kaná šundlé javire manušéndyr, ne akaná miré jakhá dykhéna tut.

⁶Paldavá me davape pale miré lavéndyr, me pridžinava miro grého dro práho i práska.”

⁷I sys adiáke: paló dová, syr Raj Devél phendiá dalé lavá Iovoske, tén'či phendiá Jov Elifazoske Fiemanostyr kadasavé lavá: “Mirí bari xolý ĥazdyjápe pe túte i pe tyré malende, pal-dová so tumé na phenenas čačipén pal Mánde, syr phendiá miro pishári Ióvo.

⁸Paldavá len akaná eftá guruvén i eftá bakrén i džán ke Miro pishári Ióvo i janén len syr svénto xačkiribnaskiro dyibén, i mek Miro pishári Ióvo te mangélpe pal tuménde. Pal-dová so me prilava léskiro mangipén, i sob (kaj) Mánge te na sykavav Péskiri zor pe tuménde pal tumaró dylnypén, pal-dová so tumé rakirdé na čačipén pal Mánde, syr miro pishári Ióvo phendiá.”

⁹O Elifazo Fiemanostyr, o Vildado Šuahostyr, i o Cofaro Naamitianino giné i kerdé adiáke, syr Raj Devél phendiá lénge; pal-dová so Raj Devél prilyjá Iovoskiri pátieri (molítva).

¹⁰I Raj Devél dyjá pale Iovoskiro mištypén, kiéli jov mangdiápe pal léskire malende. I Raj Devél dyjá Iovoske duj móly butedýr, syr sys léste.

¹¹I saré léskire pšála, saré léskire pheniá, i saré léskire pindžkirde manušá, kon sys léste, javné ke jov i jone xané maró dro léskiro kher, i jone ramaniakirenas (spokoinenas) les lačhé lavénca i podrikirenas les dro dúho (fáno) pal dová čoripén, so Raj Devél bičhadiá pe léste. Kažno léndyr dyjá Iovoske lovore i suvnakuný angrusty.

¹²I bahtiakirdiá Raj Devél Iovos dro džiibnáskiro kónco (jagóro) butýr syr vagedyr; i sys Iovoste dešuštar bará bakré, šov bará vierbliudy dro ĥámo i jekh bar oslicy.

¹³I sys adiáke-pac' Iovoste eftá čhavé i trin čhaja.

¹⁴I dyjá lav Ióvo pervonake Emima, javirjake Kezija, tritonake Kerengapuh.

¹⁵Pir sarí doiá phuv na sys kadasavja šukarnia džuvliá, syr Iovoskire čhaja i léngiro dad dyjá mištypén lénge maškír pšalénde.

¹⁶Tén'ci i dživdiá Ióvo šel te štardešá berš; i jov dykhciá péskire čhavén i unuken léskire štaré rodóstyr.

¹⁷I myjá Ióvo, phuranó i čalo dyveséndyr.