Read Biblija - Pe Baltitko Romani čib (Romanes) 2019 Baltic Romani Bible Ióvo 6 Bible Online

Ióvo 6 - Biblija - Pe Baltitko Romani čib (Romanes) 2019 Baltic Romani Bible bible

Ióvo 6

¹I otphendiá Ióvo lavénca:

²“O, te čhuvén pe ubladýtka (viésy) miro saró kalypén, i te čhuvén sarí mirí bari bída pe biz'mieny?

³Pal-odová so akaná daja bída javélas pharedyr morjoskire (derjavéskire) prahostyr, paldavá miré lavá isyn dasavé sygna.

⁴Pal-odová so Sarezorjakire — Devléskire maribnýtka bustiá (striély) isyn andrál mánde, miré masá p'jena léngiri truta (otrava): trašaibén angíl Devléste terdijá dre stonka pe mánde.

⁵Ci godlela buso (diko) óslo (miegári) pašýl čar, ci brylinela guruv paš léskiro xahaiben (miesivo)?

⁶Ci saštý te xas bi smakoskiro xabén bi londeskiro? Ci isyn vari-savó smako dro parnoreskiro bialtko?

⁷Dová, so miro di otphenelape te xal, paldavá isyn miro namišto xabén;

⁸O, sob (kaj) féni me mogindjomas te pomangav, i sob (kaj) Devél te javél dro jekhipén miré mysliasa:

⁹sob (kaj) féni te zakamel Devél, sob (kaj) Jov te rostasavel man, sob (kaj) Jov te protyrdel Péskiro vast i te xasiakirél man.

¹⁰Tedy javélas mánge ramanipen (spokojstvijo); i me zoralés radynavaspe až dre mirí dukh, so na žalinela man, so me na otphendjompe Sventoné Devléskire lavéndyr.

¹¹Kaj te lav zor mánge, sob (kaj) te užakirav lačhipén? I savó isyn miro kónco (jagóro), sob (kaj) mánge iščo (inké) te vyrikirav?

¹²Ci isyn mirí zor dasaví, syr zoralé bará isyn? Ci isyn miré masá dasavé, syr xarkóma (mied')?

¹³Ci davá ráda me kokoró péske? Ci godypén jačkirdiá man?

¹⁴Kodoléske, kon isyn zamenčyndlo, trej te užakirel lačhipén malendyr? Kóli jov féni (tóka) te na jačkirel dar angíl Sarezorjakire Devléste.

¹⁵Miré pšála obginepe mánca xohanés sýrby rékica (lenorí), sýrby rekicengiro thadyipen, so lydžála paní duredýr,

¹⁶savó isyn ciamlo ljodostyr, i dro savó iv garadjola:

¹⁷kiéli jone vyšucjona, tedy jone tyknjona; kiéli xačkiribén déla dre lénde, jone xasjona péskire šteténdyr:

¹⁸jone bandjona pir bergakire rigá, jone thadena pe čhučí phuv i xasjona.

¹⁹Femanakire karavany dykhéna pe lénde, a lodyipnaskire manušá Savejatyr (Šebatyr) rozginena (rikiréna nadiéia) pe lénde:

²⁰jone ladžana péskire patiaibnastyr; jone javéna odój, i lénde saró piripentyndiape dre godý.

²¹Adiáke-pac' i tumé akaná san sýrby kodolé rekicy: tumé dykhéna vari-so darano i tumé akaná daréna.

²²Ci phendjom me: “Janén vari-so mánge!” Ci: — “Kerén dáro mánge tumaré barvalypnastyr!”

²³Ci: — “Zrakhen man vergoskire vastéstyr!” Ci: — “Vyrakhen man pritasaibnaskire vastéstyr!”

²⁴Sykliakirén man i me javáva te rikirav čib, i kerén adiáke, sob (kaj) me te ĥaljovav, dro so me dyjompe dukhá (xohadjompe).

²⁵Saví zor isyn dre čačuné lavá! Ne savó ž isyn lačhipén, so tumé čingardenape mánca?

²⁶Ci tumé priduminena, sob (kaj) te bangiakiren man dre lavá, džinén — balvalitka isyn manušéskire lavá, konéske isyn pharó.

²⁷Dykhén: tumé čhurdena žriébije, sob (kaj) sirota (piroto) te javél tumaró pishári, i ganavena ĥanbín (jama) tumaré maléske.

²⁸Akaná, dykhén pe mánde: i angíl tumaré muiá, sob (kaj) me te xohavav?

²⁹Risjon, me mangáva tumen, fuj na javéla; risjon iščo (inké), sob (kaj) tumé te dykhén miro čačipén.

³⁰Ci isyn savó načačipén miré čibatyr? Ci na rozĥaljovava me lačhés, kaj isyn fuipén?