Read Biblija - Pe Baltitko Romani čib (Romanes) 2019 Baltic Romani Bible Ióvo 7 Bible Online

Ióvo 7 - Biblija - Pe Baltitko Romani čib (Romanes) 2019 Baltic Romani Bible bible

Ióvo 7

¹Ci manušéskiro džiibén nane saró dre pharí butý pe daja phuv? Ci manušéskire dyvesá isyn na sýrby andynarščykoskire (porobkoskire) dyvesá?

²Syr pishári xačkirdes vykedéla zer (tien'), adiáke-pac' i, andynarščyko užakiréla péskiri mazúri (nagrada).

³Adiáke-pac' i mánge dyné xartytka (sujetna) čhoná i khiniakirde ratia uphendle mánge.

⁴Kiéli me pasjovava, tedy me phenáva: “Kiéli da me uštava, i rat džála krig? I me piririsjovava sarí rat angíl zlóko (ránko).

⁵Miré masá isyn čhakirde kirmenca i prahosa, mirí cýpa pharadyja i kirnjola.

⁶Miré dyvesá prastána sygedýr thačoskire rotatyr, i prodžána adiáke, so nane sóstyr te užakirav lačhipén.

⁷Rípir, Dévla, so miro džiibén isyn balvál, miré jakhá butýr nijékhvar na dykhéna lačhipén.

⁸Kodoia jakh, kon dykhciá man, na udykhéla butýr man: kiéli Tyré jakhá risjona pe mánde, man na javéla butýr.

⁹Syr óbloko rozdžalape i našadjola, adiáke-pac' i dová, kon džála telé dro liúno (ado), na javéla pale.

¹⁰Jov butýr na risjola dro péskiro kher, nijékh léskire štetóstyr butýr na javéla te džinél les.

¹¹Pir daja pričyna me na javáva te phandav péskiro muj: me javáva te rakiráv miré-duhóskire tugatyr; me javáva te žalinavpe miré iléskire kirkipnasa.

¹²O, Dévla! Ci me som mórjo (derjáv), ci me som morjoskiro (derjavéskiro) rupučo (čudoviščo), so Tu čhuvésa stréga pe mánde?

¹³Kiéli me phenáva péske: “Miro čhuibén ramaniakirela man, i mirí pasindly (krovat') lokhiakirela mirí žaloba;

¹⁴to tedy Tu trašakiresa man sunenca, i strahakiresa dykhibnaskire zdankenca;

¹⁵paldavá Miro di vykedyjá, sob (kaj) te zatasaven man; meribén javélas fedýr dasavé džiibnastyr miré kokalenge.

¹⁶Mánge jaciá džungaló (brydindia) miro džiibén, me na javáva ŭsády (sak) te dživáv, mek man jekhdžines, pal-dová so miré dyvesá isyn čhučé sýrby phurdypen.

¹⁷So dasavo isyn manúš, so Tu adiáke barjakiresa léskiro štéto, so Tu riskiresa iló pe léste,

¹⁸so Tu javésa ke jov kažno zlóko (ránko), so Tu sprobinesa les kažno menta (minuta)?

¹⁹Sóske ĥará Tu na riskiresa Péskire jakhá mándyr, i mek man jekhdžines angíl, syr me nakhavava (glytynava) péskire salia (slina).

²⁰Kóli me kerdjom gréhi, tedy so kerdjom me túke, o Manušéskiro Stregari, sóske Tu vykedyjan man syr bakrés, adiáke so me sýrby ĥámo uridjom pe péste.

²¹Sóske tedy Tu na otmekesa miro čoripén, i na lésa krig mirí bibáht? Pal-dová so me javáva te pasjovav dro práho, i Tu zoralés javésa te rodes man rankosa (zlokosa), ne man butýr na javéla.”