Read Biblija - Pe Baltitko Romani čib (Romanes) 2019 Baltic Romani Bible Ióvo 9 Bible Online

Ióvo 9 - Biblija - Pe Baltitko Romani čib (Romanes) 2019 Baltic Romani Bible bible

Ióvo 9

¹Tén'ci Ióvo otphendiá lavénca:

²“Me džinóm (džináv), so davá isyn čačipén; ne syr o manúš saštý te javél čačunó angíl Devléste?

³Kóli jov vykedéla te čingirelpe lavénca Devlésa, jov naštý te otphenel až ni pe jekh Léskire tysjoncy phučibena.

⁴Devél isyn godó ilésa i zoralypnasa: kon terdjolas dre stonka mamúj Léste, ci kodová jačélape dro ramánjo (pokojo)?

⁵Kon piričhuvela bérgi, so nikón na džinéla davá, kiéli Jov len ravela telé dre xolý.

⁶Kon trinskirela phuv lákire štetóstyr, i lákire stýlby izdrana;

⁷Kon priphenela khameske, i kham na uštéla, i Jov čhuvéla čergeniá pe jakhítko čergenorí (piečat').

⁸Devél Kokoró čhudiá bolybén, i Jov štavela pir vučé-morjoskire (derjavéskire) valny:

⁹Jov sozdyjá pe bolybén Asos, Kiesiljos i Ximos i pašýl-dyvesytka čergeniá.

¹⁰Kon keréla drieván baré réndy, so nijékh na ĥaljola, i dívy, so naštý te poginen.

¹¹Ake, Jov prodžála pašýl mánde, i me na dykháva Les, i Jov džála pašýl duredýr, i me naštý te rozdykhav Les.

¹²Ĥáda, Jov léla krig i kon moginéla (saštý) te miešynel Léske? Kon phenéla Léske: “So Tu kerésa?”

¹³Devél na léla kri Péskiri xolý; Šuahostyr pomogibnaskire bandjona tel Léste:

¹⁴pe kicý tedy me som tyknedýr, sob (kaj) mánge te otphenav Léske, te vykedav lavá te čingiravpe lavénca Lésa?

¹⁵Mek me i sómas čačipnáskiro, me na mogindjomas te otphenav Léske, ne me féni (tóka) pomangavas miré Sendaris te tanginél man.

¹⁶Kóli me kharavas by, i Jov otphenélas by mánge, me na patiandyjom, so Jov šundiá mirí zan, —

¹⁷Jov-Kon lučkirelas (lut'kirelas) man sýrby zoralý balvál, i dukhavelas man butýr i butýr bi pričynakiro.

¹⁸Jov na domekela, sob (kaj) me te vydyhinav, ne Jov déla čalés kirkipen mánge.

¹⁹Te javél davá réndo pal zor, dykhén, savó Jov isyn zoralypnaskiro; a te javél davá réndo pal čačipén, kon saštý te del miro dyvés te sendinavpe Lésa?

²⁰Mek i te javél čačipén pal mánde, Jov zoralés sendiakirelas man miré lavénca; mek me i te javav bibangipnaskiro, Jov dophenéla, so me som načačuno.

²¹Me na som bangó, me na kamám te džináv kokoró pes, a miro džiibén jaciá džungaló (brydindia) mánge.

²²Sarenca isyn jekh; paldavá me phendjom: Jov xasiakiréla syr bidošengires, adiáke-pac' i fujé manušés.

²³Kóli čhupny muliakiréla jekhátyr (vniezapnes), Jov salape bibangipnaskirendyr, savé piridživena ke mén'ki.

²⁴Phuv isyn dyný dre bibahtalé-manušéngire vastá; Jov učhakirdiá sendar'jéngire muiá. Kóli davá nane Jov, to kon iščo (inké) davá saštý te kerél?

²⁵Miré dyvesá prastána sygedýr prastaibnaskirestyr: jone našéna krig, jone na dykhéna lačhipén.

²⁶Dyvesá prodžána syr sygna triščynitka pármy (korabli), sýrby órlo (kído), savó čhurdelape naužakirdes pe čordo doresybén.

²⁷Kóli me phenáva: “Me bistrava pal miro kalypén, so me žalindjompe, me paruvava péskiro rondlo muj i me podrikirava pes sabnasa:

²⁸me izdrava saré miré men'kendyr, me džinóm, so Tu na pridžinesa man, so Me som bibangipnaskiro.

²⁹Kóli me te javav dasavo bibahtaló, sóske tedy me keráva pharí butý ivjá?

³⁰Kóli me vymoravape ivune paniésa, i te keráv miré vastá, so jene nijékhvar na sys;

³¹ne Tu i tedy tasadiakiresa man andré bláta i miré ídi javéna sýrby te durjon mándyr.”

³²“Pal-dová so Devél isyn na manúš, syr me som, sob (kaj) mánge te otphenav Léske, i sob (kaj) aménge te džas khetané Lésa pe séndo.

³³Nane maškiratuno-manúš maškír aménde, kon moginelas by te čhuvél léskiro vast pe aménde.

³⁴Mek Devél te lel krig Péskiri ran mándyr, i mek te javél, sob (kaj) Léskiro trašaibén te na darakirel man.

³⁵Tén'ci me javáva te rakiráv, i me na javáva te darav Léstyr, ne me na som dasavo, so tumé duminéna.”