Read Biblija - Pe Baltitko Romani čib (Romanes) 2019 Baltic Romani Bible Psalmy 10 Bible Online

Psalmy 10 - Biblija - Pe Baltitko Romani čib (Romanes) 2019 Baltic Romani Bible bible

Psalmy 10

¹[9.22-r.s.] Sóske, Rajo Dévla, Tu san adiáke durál? Sóske Tu ĥaradjosa améndyr dre pharé dyvesá?

²[23] Fuj manušá, savé phutjona pes, tasavena čororé manušés, mek jone kokoré te perén zrakiribnastyr, so jone pridumindle.

³[24] Fuj manušá phutjona péskire nalačhé kamibnasa dro iló. I manušá, savé isyn ĥalka (korysna) ke čúžo mištypén, košena i tykniakirena Ras-Devlés.

⁴[25] Fuj manušá pal péskire phut'kiribén na dykhéna pe Léste, dre léngiri godý nane štéto vaš Devléske.

⁵[26] Jone dodžana ke saró dro péskiro džiibén, lénge nane pir godý te ĥaljon, syr Tu sendiakiresa, jone dykhena bipatyvákires pe péskire vergénde.

⁶[27] Jone duminéna péske: “Me nijékhvar na perava, me pir saré ródy na davape dukhá.”

⁷[28] Kiéli jone rakiréna, jone košena, xohavena i trašakirena manušén, léngiri čib rakiréla čoripén i došakirela manušén.

⁸[29] Kadasavó manúš garadjola pašýl gavoro; jov zamarela bibangipnáskire manušés pe čorahane štéty. Léskire jakhá poddykhena pal bizorjákire manušéste.

⁹[30] Jov garadjola i užakiréla syr ščer (liévo) dre xašča (logovo); jov garadjola i užakiréla odolén, kon isyn bizorjákiro. Jov uhtyléla les i tyrdela les dre péskiri felý (pietlia).

¹⁰[31] Jov bandjola ke phuv, jov pasjola, sob (kaj) te perél pe čororeste saré zorjátyr.

¹¹[32] Jov duminéla péske: “Devél bistyrdia. Jov garadia Péskire jakhá, Jov na dykhéla davá.”

¹²[33] Terdjov angíl, Rajo Dévla, pekav fujé manušén. Pridykh pal odolénde, savé stradynena.

¹³[34] Sóske fuj manúš tykniakirela Devlés? Sóske jov rakiréla péske: ‘Jov na čhuvéla kára pe mánde.’

¹⁴[35] Ne Tu dykhcián davá, pal-dová so Tu kokoró dykhésa ciamkes pe odolénde, konéske isyn pharó i kon stradynela. I kažno mólo Tu san skedynó te podel vast. Bizorjákire manúš tyrdelape ke Tu, Tu ŭsády (sak) desas vast bidadeskireske.

¹⁵[36] Phagir zor dre vastá fujé i čoré manušénde. Čhuv kára pe lénde, paka jone pirijačena te kerén čoripén.

¹⁶[37] Raj Devél isyn Králi pe saré beršá i viéki. Najudengire nácyi xasjona Léskire phuvjátyr.

¹⁷[38] Rajo Dévla, Tu šunesa, pal so mangnepe Túke odolé, savé stradynena javirendyr, Tu zorjakirdian léngiro iló.

¹⁸[39] Tu šunesa mangipén iléstyr — bidadeskiren i čororen, sob (kaj) nijékh manúš pe phuv te na trašakirel.