Read Biblija - Pe Baltitko Romani čib (Romanes) 2019 Baltic Romani Bible Psalmy 101 Bible Online

Psalmy 101 - Biblija - Pe Baltitko Romani čib (Romanes) 2019 Baltic Romani Bible bible

Psalmy 101

¹[100-r.s.] Davidóskiro Psálmo. Me javáva te bagáv pal lačhé-ilýtkima i čačunó séndo: Túke, Rajo Dévla, me javáva te bagáv psalmy.

²Me javáva te rikiravpe god'vares ke bidošakiro džiibén. Kiéli Tu javésa ke me? Me javáva te dživáv dro miro kher čačuné ilésa.

³Me na domekava, sob (kaj) miré jakhá te dykhén pe fuipén, so keréna manušá; mánge isyn ná pir iló odolé réndy, so keréna manušá, kiéli risjona krig Devléstyr, i jone na prijačena ke me.

⁴Rozmekno iló javéla te durjol mándyr, me na kamám te džináv čoré manušés.

⁵Kodolés, kon čorahanés čhuvéla patarava (pljotki) pe péskire pašatuné manušéste, Me xasiakireva. Me naštý te dykháv pe kodoleste, savó dykhéla baripnasa pe javirende i savó phutjola.

⁶Miré jakhá javéna te dykhén pe patiaibnaskirende, savé isyn pe daja phuv, sob (kaj) jone mogindlé te javén mánca dre miro kher. Kodová, savó dživéla bidošéngiro, odová javéla te dynarinél mánge.

⁷Kon že xohavela (déla dukhá) manušén, na javéla te dživél andré miro kher; nijékh, savó xohavela, na javéla zoraló angíl miré jakhá.

⁸Tasiarlatyr me javáva te xasiakiráv fujé manušén, savé isyn pe daja phuv, sob (kaj) mánge te občhinav drom fujé manušénge ke Ráskire-Devléskiro fóro.