Read Biblija - Pe Baltitko Romani čib (Romanes) 2019 Baltic Romani Bible Psalmy 103 Bible Online

Psalmy 103 - Biblija - Pe Baltitko Romani čib (Romanes) 2019 Baltic Romani Bible bible

Psalmy 103

¹[102-r.s.] Davidóskiro Psálmo. Slavin i parikir Ráske-Devléske, miro di, mek miro iló i dúho (fáno) te slavinén Les.

²Slavin i parikir Ráske-Devléske, miro di, i na bistyr léskiro baró lačhipén.

³Raj Devél primangela saró miro čoripén, Jov vysastiakirela saré miré dukhá.

⁴Jov vyrakhela tyró džiibén xasibnastyr, Jov čhudiá viánka (koróna) pe túte lačhipnastyr i lačhé-ilytkimatyr,

⁵Jov déla dová, so tu kamésa, sob (kaj) tu te dživés syr ternó órlo (kído).

⁶Raj Devél keréla saró i sendiakiréla pir čačipén odolén, savé isyn pritasade.

⁷Jov sykadiá Péskire dromá Mojzáske, Péskire keribena Izrailjoskire čhavénge.

⁸Raj Devél isyn lačhé-iléskiro i tanginela sarén, Jov nasyges xoliasóla i isyn barvaló te sykavél Léskiri lačhé-ilýtkima.

⁹Jov na sykliakiréla xoliása saró časo, Jov na rikiréla ŭsády (sak) Léskiri xolý.

¹⁰Jov na kerdiá adiáke, sob (kaj) ame te javas bangé pal amaré gréhi, Jov na otdyjá pale fuipnasa aménge pal amaró čoripén.

¹¹Pal-dová so syr vučés isyn bolybén phuvjátyr, adákicy-pac' but isyn lačhé-ilýtkima Devléste vaš odolénge, savé daréna Léstyr.

¹²Adákicy dur isyn čačé rigátyr ke zérvo (liévo) rig pe phuv, adákicy-pac' dur jov čhuvéla krig amaré gréhi.

¹³Syr adákicy but dad tanginela péskire čhavorén, adiáke-pac' zoraló Raj Devél tanginela odolén, savé daréna Léstyr.

¹⁴Pal-dová so Jov džinéla, sóstyr ame sam sozdyne, Jov ripirela, so ame sam féni (tóka) práho.

¹⁵Manušéskire dyvesá isyn sýrby čar, syr luludí (cveto), so isyn pe félda, adiáke-pac' i manúš dživéla:

¹⁶sýrby balvál, so sýges provurniala i nane les i nikón na udžinela léskiro štéto.

¹⁷Ne Ráskire-Devléskiri lačhé-ilýtkima isyn bijagoroskiro vaš odolénge, savé daréna Léstyr, a léskiro čačipén vaš čhavéngire čhavénge,

¹⁸vaš odolénge, savé rikirenape ke Léskiro Zavieto, savé ripirena i keréna adiáke-pac' pir Léskire priphenybená.

¹⁹Raj Devél začhudia trono Péske pe bolybén i léskiro kralipén rikiréla zor pir saró.

²⁰Slavinén i parikirén Ráske-Devléske, saré Léskire Jangóly, savé isyn drieván zoralypnaskire, savé keréna pir léskiro lav, savé kandéna léskiro lav.

²¹Slavinén i parikirén Ráske-Devléske, saré Léskire bolybnáskire Jangóly, saré tumé, kon dynarinela Léske, kon keréla pir Léskiri vólia.

²²Slavinén i parikirén Ráske-Devléske, saré Léskire butiá, dre saré Léskire štéty, kaj Jov rikiréla zor! Slavin i parikir Ráske-Devléske, miro di.