Read Biblija - Pe Baltitko Romani čib (Romanes) 2019 Baltic Romani Bible Psalmy 105 Bible Online

Psalmy 105 - Biblija - Pe Baltitko Romani čib (Romanes) 2019 Baltic Romani Bible bible

Psalmy 105

¹[104-r.s.] Parikirén, tumé, Ráske-Devléske! Kharén Léskiro lav! Rosphenén manušénge, so Jov kerdiá.

²Bagán Léske, bagán psalmy Léske, rozlen saré Léskire dívna butiá.

³Sláva Léskire sventoné lavéske; mek te radynélpe iló do manušéngiro, kon rodéla Ras-Devlés.

⁴Rodén Ras-Devlés i Léskiri zor, rodén Les usady (sak):

⁵ripirén Léskire dívy, so Jov kerdiá, Léskire drieván baré dívy i lavá, savénca Jov sendiakirdia Péskire mósa.

⁶O, tumé san Avramoskiro ródo, Léskire-pishariskire, tumé, Jakovóskire čhavé, savés Jov vykedyjá.

⁷Jov isyn Raj Devél, amaró Devél, Jov sendiakiréla pir sarí phuv.

⁸Jov usady (sak) ripirela Péskiro Zakóno, lavá, savé Jov priphendiá barenge (tysjoncenge) rodénge,

⁹savé Jov dyjá Avraamóske, i pal savé Jov dyjá sovláh Isakoske,

¹⁰i Jov čhudiá zor pe dalé lavá, syr pe statúto Jakovóske, syr viéčno Zakóno Izrailjoske,

¹¹phení: “Me dáva Xanaanóskiri phuv túke, syr paš tumaré mekné mištypnástyr”,

¹²kiéli len sys nábut, manušén odój, drieván nábut, i jone sys čúža manušá odój.

¹³I tumé džánas jekhe nacyjatyr ke javír, jekhe kralipnastyr ke javír manušá.

¹⁴Devél na dyjá vólia nikonéske te tasavel. Devél vyrakirelas zoralés kral'jén pal lénde,

¹⁵rakirí: “Na čilaven Miren, Savén Me pomakhcjom. Na kerén čoripén Miré prorokenge.”

¹⁶I Jov vykhardia bokh pe phuv, Jov xasiakirdiá kažno raslina, so déla maró.

¹⁷Jov bičhadiá manušés angíl lénde: Joza (Iosifo) sys bikindlo syr pishári.

¹⁸Jone dukhade Léskire ĥerá zandir'jenca, a léskiro di gijá dre sastyrá,

¹⁹angíl davá časo, syr léskiro lav javdiá: Ráskire-Devléskiro lav sprobindia les,

²⁰Králi bičhadiá i vymekcia les pe vólia, čhudiá les barydyrésa pir manušénde i mekciá les pe vólia.

²¹Jov kerdiá les rása pir léskiro kher i barydyrésa pe saró, so sys léste,

²²sob (kaj) jov te uphenel léskire kralískire semencenge, syr trej léske, i te sykliakirél godypnaske léskire phuren.

²³Izrailjo adiáke-pac' javdiá dro Jegípto i Jakovo adiáke-pac' pritradyja pe Xamoskiri phuv.

²⁴I Devél dyjá but čhavén léskire manušénge, i Jov kerdiá adiáke, so jone jačné zoraledýr péskire vergéndyr.

²⁵Jov riskirdiá Jegiptóskire-manušéngire ile zoralés te na den patýv Léskire manušénge, te otlydžanpe frentymasa Léskire dynar'jénca.

²⁶Devél bičhadiá Mojzás, Péskire pisharís, i Aronos, konés Jov vykedyjá,

²⁷jone sykade Léskire znamiénii (ĥiertyká) maškír lénde dro Jegípto, i kerdé dívy pe Xamoskiri phuv.

²⁸Devél bičhadiá kalypén (ciamlypén) i kerdiápe kales i jone na kerdé búnto proti Léskire lavá.

²⁹Jov pirikerdia paní ratésa i xasiakirdiá léngire mačhen.

³⁰Phuv sys pherdý capnienca až dre kralískire štúby.

³¹Devél dyjá priphenybén i javné but dukhane matlia (nasiekoma) i dzyndzarja (komary) pe sarí doiá phuv.

³²Jov dyjá grado zamiést bryšýnd, bičhadiá jag, so saró xalas, pe léngiri phuv.

³³Jov adiáke-pac' xasiakirdiá léngire-vinagradoskire kaštá i léngire inžyritka kaštá i rospharadia vešá pe léngiri phuv.

³⁴Jov phendiá i javné phakitka skočki (saranča) i but skočkengire kirmore, so naštý te piriginen.

³⁵I jone xané upré saré rasliny pe kadaja phuv i pohane sarésa dová, so bijándyja pe léngire féldy.

³⁶Devél adiáke-pac' muliakirdiá sarén pervoné bijatén, savé bijándyne dro Jegípto, rádyma i zor sem'iakiri.

³⁷Tén'ci Jov lydžijá len krig rupésa i suvnakása, i na sys nikón, savó te javél bizorjákiro maškír kadalé jekhé-čibákire / čangá (kolieny).

³⁸Jegípto sys rado, so jone giné, pal-dová so pe lénde pyjá dar Judendyr.

³⁹Devél rosčhudiá óbloko te garaven len, i jag te javél losása (svéto čhonestyr) lénge ratý.

⁴⁰Jone pomangne i Jov dyjá pieriepjolen lénge i čaliakirdia čalés len marésa bolybnástyr.

⁴¹Jov otčhakirdiá bérga-skála, i paniá dynepe te thaden, pothadyne syr reka (len') pir šuké štéty.

⁴²Pal-dová so Jov ripirdia léskiro svénto lav, Savó Jov dyjá Avramoske, Léskire dynaríske;

⁴³i Jov vylydžijá Léskire manušén radymása, Léskire vykedyné manušén radymása;

⁴⁴Jov dyjá lénge phuvjá Najudytkoné nacyiéndyr i jone doresné syr meknó mištypén dalé manušéngire obkerde féldy:

⁴⁵sob (kaj) jone moginénas te rikirenpe zoralés ke Léskire statúty (ustavy), i te rikirenpe ke Léskire zakóny. Alliluia Ráske-Devléske.