Read Biblija - Pe Baltitko Romani čib (Romanes) 2019 Baltic Romani Bible Psalmy 107 Bible Online

Psalmy 107 - Biblija - Pe Baltitko Romani čib (Romanes) 2019 Baltic Romani Bible bible

Psalmy 107

¹[106-r.s.] Parikirén Ráske-Devléske, pal-dová so Jov isyn lačhó i Léskiri lačhé-ilýtkima jačélape pe saré viéki.

²Mek saré, konés vyrakhcia Raj Devél, te phenén adiáke, konés Jov vyrakhcia vergoskire vastéstyr,

³i skedyjá khetané Jov phuv'jendyr: čačé rigátyr (vastokóstyr) i zervoné / pal-panitkoné (zapadóstyr), paš-ratitkoné (sieviernone) rigátyr i paš-dyvesytkoné (južnone) rigátyr.

⁴Jone psirdé pir čhučé prahi (pustyni) pir čhučó drom, jone na rakhne fóro, kaj te dživén manušá,

⁵jone sys bokhalé i trušale (žaždyndle), léngiro di zamyjá;

⁶jone rondlé godlása angíl Raste-Devléste dro pharipén i Jov vyrakhcia len baré darátyr,

⁷i Jov lydžijá len lačhé dromésa te dodžan ke fóro, sob (kaj) te dživén odój.

⁸Mek saré te parikirén Ráske-Devléske pal Léskiri lačhé-ilýtkima i saré Léskire dívna butiá manušéngire čhavénge,

⁹pal-dová so Jov dyjá čalés odolengire dijenge, kon sys trušalo (smegitko) i pherdiakirdiá bokhalo di lačhipnása.

¹⁰Adasavé manušá dživdé dro kalypén (ciamlypén) i dre meribnaskiri zer (tienjo), jone sys phandle i pritasade,

¹¹pal-dová so jone ĥazdyné búnto proti Devléskire lavá i na prilyné ke godý Samone (Naj) Vučedyreskire-Devléskiri duma;

¹²i Jov bandiakirdia léngire ile pharé butiasa; jone pyné i na sys nikón te podel vast:

¹³tén'či jone dyné gódla jasvénca ke Raj Devél dre péskiri bari dar, i Jov zrakhciá len léngire baré darátyr,

¹⁴Jov vylydžijá len kalypnástyr i meribnaskire zerjatyr (tienjostyr) i Jov phagirdiá pe koterá (kuski) léngire sastyrá,

¹⁵mek jone te parikirén Ráske-Devléske pal Léskiri lačhé-ilýtkima, i Léskire dívy manušéngire čhavénge,

¹⁶pal-dová so Jov phagirdiá xarkuny (miedno) pórta i roskuscia sastruné šybiery (zapory).

¹⁷Dylyné manušén pritasavenas pal léngire gréhi i pal léngiro čoripén;

¹⁸léngiro iló otriskirdiape kažnoné xabnastyr, i jone džánas pašýl ke pórta meribnaskiri:

¹⁹tén'či jone dyné gódla jasvénca ke Raj Devél, kiéli sys pharó lénge, i Jov zrakhciá len baré darátyr.

²⁰Jov bičhadiá Péskiro lav i vysastiakirdiá len i vyrakhcia len léngire xasibnastyr.

²¹Mek jone te parikirén Ráske-Devléske pal Léskiri lačhé-ilýtkima i pal Léskire dívna butiá manušéngire čhavénge.

²²I mek jone te parikirén Ráske-Devléske sventoné dyibnasa te parikirén, i mek jone te rosphenén sarénge pal Léskire butiá radymakire giliasa.

²³Odolé, savé plyvinenas (dénas plíma) pir móri (derjavá) pe pármy, ci savé keréna kófo (pol'za) pir baré paniá,

²⁴jone dykhéna Ráskire-Dev-léskire butiá i Léskire dívna réndy pe xor štéty.

²⁵Pal-dová so Jov phenéla i ĥazdélape štormitko balvál, saví vučés ĥazdéla morjoskire (derjavéskire) valny:

²⁶pármy (korabli) manušénca džána upré ke bolybén, tén'či jone peréna telé ke xor štéty; a manušénde, so odój bešté, di biladjola baré darátyr;

²⁷jone krenžynena odorík i pale i jone kuninénaspe (šatynenape) syr mate, a léngiro godypén nisó na mol:

²⁸tén'či jone déna gódla jasvénca Ráske-Devléske, kiéli sys pharó lénge i Jov zrakhéla len léngire pharipnastyr;

²⁹Jov štyliakirela štormo adiáke, so léngire valny (velny) jačéna štyl (tiha),

³⁰i jone isyn ráda, pal-dová so paniá jačéna štyl i Jov vylydžala len ke prijačytko (pristan'), ke so jone tyrdynepe.

³¹Mek adalé manušá te parikirén Ráske-Devléske pal Léskiri lačhé-ilýtkima i Léskire dívna butiá vaš manušéngire čhavénge;

³²mek jone te barjakirén ke vučypen Les adiáke-pac' pe manušéngiro skedyibén i te šarén Les pe godephurengiro rakiribén.

³³Raj Devél pirikerela réki (leniá) pe čhučé prahi i panieskire ĥanyngorja pe šukí phuv:

³⁴umalotna phuvjá pe londo šuko štéto — pal dolé manušéngiro fuipén, kon dživéla odój.

³⁵Jov piriskirela šuké phuvjá dre ziero (oziero) i šukí phuv dre panieskiri ĥanyngori (krynica).

³⁶Jov čhuvéla bokhalen te dživén odój, sob (kaj) jone mogindlé te ĥazdén fóro te dživén,

³⁷i sob (kaj) jone te počhuven ziárki dre féldy i te čhuvén vinagradýtka unty (sady), sob (kaj) jone te den umalotno pribaripen (aplodo).

³⁸Jov adiáke-pac' bahtiakirdiá len, sob (kaj) jone te rozbarjon zoralés, i Jov na domekela, sob (kaj) te javél tyknedýr murdalén lénde.

³⁹Ne kiéli len jaciá tyknedýr, i jone jačné štyl (tiha) — len teliakirenas, pritasavenas i kaliakirenas,

⁴⁰tedy Raj Devél čhudiá ladž pe baré rande Najudytkoné nacyiéndyr i kerdiá adiáke, so jone giné te psirén odorík, pale pe čhučí phuv, kaj nane drom.

⁴¹Ne Jov ĥazdyjá čororé manušén pritasaibnastyr i začhudia Léngire sem'i (irjá) te javén syr gurty.

⁴²Patiaibnaskire dykhéna davá i radynénape, a saré čoré manušá phandena péskire muiá.

⁴³Kon isyn godó, mek jov te rikirelpe ke saró davá, mek jov te ĥaljol Ráskire-Devléskiri lačhé-ilýtkima.