Read Biblija - Pe Baltitko Romani čib (Romanes) 2019 Baltic Romani Bible Psalmy 109 Bible Online

Psalmy 109 - Biblija - Pe Baltitko Romani čib (Romanes) 2019 Baltic Romani Bible bible

Psalmy 109

¹[108-r.s.] Xoróskire Dirižoróske. Davidóskiro Psálmo. Na jav štyl, o Dévla, sláva Túke!

²Pal-dová so čoré i xohané manušá rakiréna pe mánde: jone rosphenena pal mánde xohané čibása (čibjasa),

³jone občhuvena man, kaj kaména, xohané lavénca i xoliása, i jone džána maribnása pe mánde bi pričynakiro.

⁴Pal miro iló jone jačné mánge miré vérgi, ne me mangavpe Devléske pal lénde.

⁵I me dorescjom léndyr fuipén pal miro lačhipén, i jone bidykhena man pal mirí patýv ke javír.

⁶Čhuv čoré manušés pe miré vergoste, mek nálačho te terdjol pe léskiri čačí rig;

⁷kiéli les javéna te sendiakiren, mek te pridžinen les, so jov isyn bangó;

⁸mek léskiro mangipén te jačél grehosa;

⁹mek léskire dyvesá te javén krotka, sob (kaj) javír manušá te len léskiri butý;

¹⁰mek léskire čhavé ŭsády (sak) te mangén dyibén i te psirén bi štetoskiro, i te rodén maró dur šteténdyr, kaj vytradyné len;

¹¹mek odová, kon zalela lové léske, te čhuvél felý (pietlia), sob (kaj) te otlel saró léstyr, i mek čúža manušá te občoren saró, so jov zakerdia,

¹²mek nikón te na sykavél lačhé-ilýtkima angíl léste, mek nikón te na otlydžalpe ilésa ke léskire piróty (siroty),

¹³mek léskiri seménca te xasjol, mek te na javén léngire vurmy (familii) maškír javír ródo.

¹⁴Mek Raj Devél te ripirel čoripén, so kerdé léngire dadá, mek gréhi, so kerdé léngire daja, te na javén bistyrde.

¹⁵Mek Raj Devél te ripirel léngire gréhi, sob (kaj) Jov te xasiakirél ripiribén pal lénde pe phuv:

¹⁶pal-dová so jone na dumindle te javén lačhé-iléskire, a jone pritasavenas čororen i manušén dre trébima; i domarenas odolén, konéste kalypén sys pe iló.

¹⁷Kadavá manúš sys skedynó te prokošel, i mek léskiro prokošybén te jačélpe pe léste. Jov, kadasavó manúš, na vyphendia bahtiakiribén, mek kokoró bahtiakiribén te džal krig léstyr.

¹⁸I dasavo manúš sýrby uridia pe péste prokošybén syr thalík / kúl'ko (pidžako), mek léskiro prokošybén te džal andré léskire vindyrja syr paní, i syr dzet (aliejo) dre léskire kokalý;

¹⁹mek te javél léskiro prokošybén syr uribén, so jov čhuvéla pe péste, i syr kustýk, sósa jov podphandelape.

²⁰Mek saró davá te javél syr mazúri (nagrada) Rástyr-Devléstyr miré vergénge i javirénge, kon rakirdiá čoripén pe mánde.

²¹Ne Tu, Dévla, Raje Dévla, pomógin mange vaš Tyró lav, zrákh man: pal-dová so Tyrí láska isyn drógo.

²²Pal-dová so man pritasavéna i mánge isyn pharó, i miro iló isyn dukhado dre mánde.

²³Syr zer (tienjo) me xasjovava, kiéli joj kerlape dind'kirdedyr, man tradéna syr skočkos.

²⁴Miré čangá jačné bizorjákire, pal-dová so mirí loč (plot') vyšucija bi thulypnaskiro.

²⁵I kadalé manušá obrakirena man: jone dykhéna pe mánde i kuninena šerenca.

²⁶Pomogin mánge, Rajo Dévla, miro Dévla; zrákh man pir Tyrí lačhé-ilýtkima:

²⁷sob (kaj) jone te džinén, so davá isyn Tyró vast, so Tu, Rajo Dévla, kerdián davá.

²⁸Mek jone te prokošen, ne Tu javésa te bahtiakires: jone ĥazdénape pe mánde i javéna ladžakirdé, i Tyró pishári javéla te radynélpe.

²⁹Mek miré vérgi te ur'jen pe péste ladž syr ídia, i učhakiren pes ladžasa syr kul'kosa (thalikosa).

³⁰Me javáva zoralés te parikiráv Ráske-Devléske miré mósa i me javáva te šaráv Les maškír manušénde.

³¹Pal-dová so Jov javéla te terdjol pir čačí rig pašýl čororende, Jov javéla te zrakhél odolé manušés, savés sendiakirena.