Read Biblija - Pe Baltitko Romani čib (Romanes) 2019 Baltic Romani Bible Psalmy 115 Bible Online

Psalmy 115 - Biblija - Pe Baltitko Romani čib (Romanes) 2019 Baltic Romani Bible bible

Psalmy 115

¹[113-r.s.] [9] Na amen, o Rajo Dévla, na amen, ne jekh Tyró Lav trej te šarén, pal-dová so Tu san lačhé-iléskiro, pal Tyró patiaibén.

²[10] Sóske Najudýtka nácyi rakiréna? “Kaj isyn kakaná léngiro Devél?”

³[11] Ne amaró Devél isyn pe bolybén: Jov kerdiá saró, so Jov kamdiá.

⁴[12] Ne léngire ídoly (xohané devloré) isyn rupéstyr i suvnakástyr, savé manušéngire vastá kerdé:

⁵[13] lénde isyn muj, ne jone na rakiréna; lénde isyn jakhá, ne jone na dykhéna;

⁶[14] lénde isyn kaná, ne jone na šunéna; lénde isyn nakh, ne jone na sungena;

⁷[15] lénde isyn vastá, ne jone nisó na moginéna te kerén lénca; lénde isyn ĥerá, ne jone na psiréna; i jone na phenéna nisó péskire kirlesa;

⁸[16] mek saré, kon kerdiá len, te javén bizorjákire, syr jone isyn; adiáke-pac' i saré odolé, kon patiála dre dalé ídoly.

⁹[17] O, Izráilie! Patia zoralés Ráske-Devléske; Jov pomoginela i zaterdjola pal tuménde.

¹⁰[18] Aronoskiro kher, patia zoralés Ráske-Devléske: Jov pomoginela i zaterdjola pal tuménde.

¹¹[19] Tumé, savé darén Rástyr-Devléstyr; patián zoralés Ráske-Devléske, Jov pomoginela i zaterdjola pal tuménde.

¹²[20] Raj Devél ripirela pal aménde: Jov bahtiakiréla amen; Jov bahtiakiréla Izrailjoskiro kher, Jov bahtiakiréla Aronoskiro ródo.

¹³[21] Jov bahtiakiréla odolén, savé daréna Rástyr-Devléstyr, tyknen i baren.

¹⁴[22] Raj Devél javéla te del butedýr i butedýr čhavorén túke i tyré čhavénge.

¹⁵[23] Raj Devél, Kon sozdyjá bolybén i phuv, bahtiakiréla tut.

¹⁶[24] Bolybén isyn Ráskire-Devléskiro bolybén, ne Jov dyjá phuv manušéngire čhavénge.

¹⁷[25] Mulé na šarena Ras-Devlés, adiáke-pac' ni odolé, savé džána dro štéto, kaj isyn štyl.

¹⁸[26] Ne ame javása te bahtiakiras Ras-Devlés adadyvesatune dyveséstyr i pe saré viéki. Alliluia.