Read Biblija - Pe Baltitko Romani čib (Romanes) 2019 Baltic Romani Bible Psalmy 118 Bible Online

Psalmy 118 - Biblija - Pe Baltitko Romani čib (Romanes) 2019 Baltic Romani Bible bible

Psalmy 118

¹[117-r.s.] Parikirén Ráske-Devléske, pal-dová so jov isyn lačhó! Pal-dová so Léskiri láska javéla pe saré viéki.

²Mek Izrailjoskiro kher te phenél akaná: “Léskiri láska jačélape pe saré viéki.”

³Mek Aronoskiro kher te phenél kakaná, so Léskiri lačhé-ilýtkima jačélape pe saré viéki.

⁴Mek odolé, savé daréna Rástyr-Devléstyr te phenén kakaná, so Léskiri lačhé-ilýtkima jačélape pe saré viéki.

⁵Me khardjom Ras-Devlés baré darátyr (darjatyr), Jov otphendiá mánge i vylydžijá pe baró štéto.

⁶Raj Devél isyn pal mánde, Me na javáva te darav, so manúš moginéla te kerél mánge.

⁷Raj Devél isyn pal mánde maškír odolénde, savé déna vast mánge: me dykháva, syr peréna odolé, savé bidykhena.

⁸Davá isyn fedýr te ĥaradjos te zrakhespe pal Raste-Devléste, syr te ĥaradjos te zrakhespe pal manušéste.

⁹Davá isyn fedýr te ĥaradjos te zrakhespe ke Raj Devél, syr te risjos te zrakhespe ke thagárja.

¹⁰Saré Najudýtka nácyi obgine trusciál mánde, ne me xasiakiráva len Ráskire-Devléskire lavésa.

¹¹Jone obgine trusciál mánde, čačó, obgine trusciál mánde; ne me xasiakiráva len Ráskire-Devléskire lavésa.

¹²Jone obgine trusciál mánde syr byrlinia (pčoly), i jone murdine syr jag dre xrústy suv'jenca; ne me xasiakiráva len Ráskire-Devléskire lavésa.

¹³Jone špulde (tolkindle) man i pekade te perav; ne Raj Devél dyjá vast mánge.

¹⁴Raj Devél isyn miro zoralypén i mirí gilý radymása i Jov zrakhciá man.

¹⁵Šunén zaniá radymása pal zrakhibén dre šátry, kaj isyn Devléskire manušá.

¹⁶Čačó vast Ráskire-Devléskiro ĥazdynó, čačó vast Ráskire-Devléskiro pirizorjakirela.

¹⁷Me na meráva, ne me javáva te dživáv i te rosphenav pal Ráskire-Devléskire butiá.

¹⁸Raj Devél pharés sykliakirdiá man, ne Jov na dyjá man meribnáske.

¹⁹Otphanden (psiravén) mánge pórta, kaj zadžána čačipnaskire, me džáva andré, i me javáva te šaráv zoralés i te parikiráv Ráske-Devléske.

²⁰Davá isyn pórta ke Raj Devél: čačipnaskire zadžána pir láte.

²¹Me javáva te parikiráv Túke, pal-dová so Tu otphendian mánge i Tu zrakhcián man.

²²Bar, Savó na prilyné butiarné, jaciá šeralé baresa vaš keriben kherítko:

²³davá jaciá Devléstyr, davá isyn divno dre amaré jakhá.

²⁴Davá isyn dyvés, dro savó Raj Devél adiáke kerdiá, ame javása te radynaspe i ame javása bahtalé.

²⁵Zrákh man, Rajo Dévla, me zoralés mangáva Tut! Rajo Dévla, me zoralés mangáva Tut, bahtaliakir amaró džiibén.

²⁶Bahtaló isyn odová, savó javéla Ráskire-Devléskire lavéstyr. Ame bahtiakirdiam tumen Ráskire-Devléskire Khangirjátyr.

²⁷Raj Devél isyn amaró Devél i Jov dyjá dud aménge: phanden svénta dyibená šelenca ke altarjoskire šyngá (rógi).

²⁸Tu san miro Devél i me javáva te šaráv ke vučipén Tut, Miro Dévla! Me javáva te parikiráv Túke.

²⁹Parikirén Ráske-Devléske, pal-dová so Jov isyn lačhó: pal-dová so Léskiri lačhé-ilýtkima jačélape pe saré viéki.