Read Biblija - Pe Baltitko Romani čib (Romanes) 2019 Baltic Romani Bible Psalmy 12 Bible Online

Psalmy 12 - Biblija - Pe Baltitko Romani čib (Romanes) 2019 Baltic Romani Bible bible

Psalmy 12

¹[11-r.s.] Xoróskire Dirižoróske. Pe balytka Strumiénty. Davidóskiro Psálmo.

²Pode vast, Rajo Dévla, devlýtka manušá otginé sarésa, patiaibnytkone manušén butýr nane.

³Jone rakiréna xohané lavá jekh jekhéske, nane patiaibén léngire čibatyr, biladžaipnytka isyn léngire dúmy.

⁴Raj Devél zaphandela napatiaibnytka muiá; čib, so rakiréla phut'kirdé lavá,

⁵Odolénge, kon phendiá: “Ame lása upralypén amaré čibása, amaré lavá džána pal aménde: Kon da isyn raj aménge.”

⁶Pal-dová so manušá stradynena i len tasavena, pal-dová so manušá dre trébima déna ĥondiá. “Me terdjovava angíl” — phenéla Raj Devél, Me prirakhava len, syr jone drieván kaména te uhtylén,

⁷Ráskire-Devléskire lavá isyn čačuné sarésa syr rup, so isyn probindlo dre ĥleja (glina), i so žužakirdo eftá (bitrinéngiro deš) móly.

⁸Tu, Rajo Dévla, javésa te rakhés len, Tu prirakhesa amen dasavé manušéndyr pe saré viéki,

⁹Fuj manušá psiréna pe kažno štéto, a bidytka manušýtka čhavé ĥazdénape.