Read Biblija - Pe Baltitko Romani čib (Romanes) 2019 Baltic Romani Bible Psalmy 132 Bible Online

Psalmy 132 - Biblija - Pe Baltitko Romani čib (Romanes) 2019 Baltic Romani Bible bible

Psalmy 132

¹[131-r.s.] Gilý angíl Khangirí. Rajo Dévla! Rípir Davidós i saró léskiro pharipén,

²syr jov sovlahadiá Ráske-Devléske i dyjá sovláh, Jekhoreske Jakovoskireske, Zoralypnaskire Devléske:

³“Me na džáva dre šátra miré kheréskiri, me na pasjovava upré miré-čhuibnaskiri pe cérga,

⁴me na dáva miré jakhenge te soven, me adiáke-pac' na dáva líndra (te na drieminav) miré cymblenge (riesnicenge),

⁵angíl dová, syr me lathava štéto Ráske-Devléske, šátra, Jakovóskire Zoralypnaskire Devléske.

⁶Ame šundiám pal léste ke Jefrafo, ame lathiam les pe Iarimoskire (Jarimoskire) féldy.

⁷Javén, dasá patyv pe čangá pašyl Léskire šátry, javén dasa patýv pe čangá pašýl Léskire ĥerá.

⁸Jav, Rajo Dévla, pe Tyró štéto te otkhinjos, Tu, i Tyró kovčego (mohtó) Zakonosa, so sykavéla Tyró zoralypén.

⁹Mek te ur'jen Tyré rašaja pe péste čačipén, mek te radynénpe zoralés Tyré svénta.

¹⁰Na risjov krig Péskire Pomakhne manušéstyr pal Davidóste, Tyré pishariste.

¹¹Tu sovlahadian čačipnása Davidóske, so Tu na risjosa krig Léstyr: “Me čhuváva pe trono Tyré čhavés.

¹²Kóli Tyré čhavé javéna te rikirenpe ke Miro Zakóno i ke Miré dophenybena, savénge Me javáva te sykliakirav len, tedy i léngire čhavé adiáke-pac' javéna te bešén pe trono pe saré viéki.”

¹³Raj Devél vykedyjá bérga Sióno, saví jaciá drógo Léske, sob (kaj) te dživél odój:

¹⁴“Davá isyn Miro štéto te otkhinjovav pe saré viéki, me javáva te dživáv adái, pal-dová so joj iaciá drógo Mánge.

¹⁵Me, čačes, bahtiakirava lákiro xabén, Me dáva čalés čororé manušénge;

¹⁶i Me urjavava lákire rašán zrakhibnasa i lákire svénta javéna te den gódla radymása.

¹⁷Me keráva adiáke, so vybarjola Davidoskiri zor dre čhavéste, Me keráva momolýtko (svietíl'niko) Miré Pomakhneske.

¹⁸Me urjavava léskire vergén ladžaipnasa; ne léskiri viánka (koróna) javéla te ziainel pe léste.”