Read Biblija - Pe Baltitko Romani čib (Romanes) 2019 Baltic Romani Bible Psalmy 135 Bible Online

Psalmy 135 - Biblija - Pe Baltitko Romani čib (Romanes) 2019 Baltic Romani Bible bible

Psalmy 135

¹[134-r.s.] Alliluia! Šarén Ras-Devlés! Šarén tumé Ráskire-Devléskire pishárja,

²savé isyn terdé dro Ráskire-Devléskiro Kher dre gredy (dvory) ke amaré Devléskiro Kher.

³Šarén Ras-Devlés; pal-dová so Jov isyn lačhó! Bagán psalmy Léskire lavéske, pal-dová so Jov isyn drógo.

⁴Jov vykedyjá Jakovós vaš Péske, a Izrailjo syr Péskiro mištypén.

⁵Pal-dová so me džinóm, so Raj Devél isyn baró i amaró Raj Devél isyn vučedýr saré devlorendyr.

⁶Raj Devél keréla saró, so Léske zakamelape, ci pe bolybén, ci pe phuv, ci dre móri (derjavá), ci dre saré xor štéty.

⁷Jov keréla adiáke, so óbloki ĥazdénape phuvjákire jagorendyr; Jov keréla adiáke so džána bliskavícy bryšyndesa, Jov janéla balvalia Péskire skladendyr.

⁸Jov xasiakirdiá pervones, kon bijandjola ci manušénde ci kheritkoné murdalénde (maškír skoto) dro Jegípto;

⁹Jov bičhadiá znamiénii (ĥiertyká) i dívy maškír Túte, o Jegípto, pe Faraonoste i saré Léskire dynar'jende?

¹⁰Jov xasiakirdiá baré Najudýtka nácyi i muliakirdiá but kral'jén:

¹¹Sigonos, Amoriejéngire kralís, Ogos, Vasanoskire kralís i saré Xanaanoskire kralipená.

¹²I Jov dyjá léngiri phuv syr meknó mištypén Péskire manušénge Izrailjostyr.

¹³O, Rajo Dévla! Tyró lav jačélape pe saré viéki! O, Rajo Dévla! Ripiribén pal Túte isyn rodóstyr ke ródo.

¹⁴Pal-dová so Raj Devél javéla te sendiakirél Péskire manušén, i Jov javéla lačhé-dieskiro ke Péskire pishárja.

¹⁵Najudytkoné-nacyiengire ídoly isyn rupéstyr i suvnakástyr, manušéngire vastá kerdé len:

¹⁶lénde isyn muiá, ne jone na phenéna nisó, lénde isyn jakhá, ne jone na dykhéna;

¹⁷lénde isyn kaná, ne jone na šunéna, i nane phurd (dyhanijo) léngire móstyr.

¹⁸Mek odolé, savé kerdé len, te javén dasavé-pac' syr léngire ídoly; i saré javír manušá, savé užakiréna lačhipén dalé statuléndyr (statujendyr).

¹⁹Manušále Izrailjoskire kheréstyr! Tumé te vyšaren i te parikirén Ráske-Devléske! Aronoskiro kher! Te vyšaren tumé i te parikirén Ráske-Devléske!

²⁰Manušále Lievijoskire kheréstyr! Te vyšaren tumé i te parikirén Ráske-Devléske! Tumé, savé daréna Rástyr-Devléstyr, te vyšaren i te parikirén Ráske-Devléske!

²¹Te vyšaren i te parikirén Ráske-Devléske Sionóstyr, Savó dživéla ke Jerusalimo! Alliluia!