Read Biblija - Pe Baltitko Romani čib (Romanes) 2019 Baltic Romani Bible Psalmy 138 Bible Online

Psalmy 138 - Biblija - Pe Baltitko Romani čib (Romanes) 2019 Baltic Romani Bible bible

Psalmy 138

¹[137-r.s.] Davidóskiro Psálmo. Me javáva te parikiráv Túke saré miré iléstyr, me javáva te bagáv psalmy túke angíl devlorende.

²Me javáva te kloninavpe patyvása ke Tyrí svénto Khangirí i te vyšarav Tyró lav pal Tyró drógo lačhipén, i pal Tyró patiaibén, pal-dová so Tu ĥazdyjan vučedýr saréstyr Tyró lav.

³Tu otphendian mánge dro dyvés, kiéli me dyjom gódla jasvénca: Tu kerdián murškanedyr man, kiéli Tu dyján zor miré dieske.

⁴Saré králja pe phuv javéna te vyšaren Tut, o Rajo Dévla, pal-dová so jone šundlé lavá, so Tu phendián.

⁵I jone javéna te bagán pal Ráskire-Devléskire dromá, pal-dová so Raskiri-Devléskiri sláva isyn vučy.

⁶Mek Raj Devél isyn vučés, ne Jov dykhéla telé pe odolénde, savé kandéna Les, a phut'kirdes Jov pindžkirela duripnastyr.

⁷Kóli javéla pharó mánge saré rigéndyr, Tu džidiakiresa nevéstyr man: Tu dind(z)'kiresa (tyrdesa) Tyró vast, kiéli vérgi zoralés xoliasona i Tyró čačó vast vyterdela man bidatyr.

⁸Raj Devél keréla adiáke, so me javáva bidošéngiro: Tyrí lačhé-ilýtkima, o Rajo Dévla, jačélape pe saré viéki; na mek butiá, so kerdé Tyré vastá.