Read Biblija - Pe Baltitko Romani čib (Romanes) 2019 Baltic Romani Bible Psalmy 139 Bible Online

Psalmy 139 - Biblija - Pe Baltitko Romani čib (Romanes) 2019 Baltic Romani Bible bible

Psalmy 139

¹[138-r.s.] Xoróskire Dirižoróske. Davidóskiro Psálmo. O, Rajo Dévla, Tu rozdykhcian lačhés man, i Tu džinésa man.

²Tu džinésa, kiéli me bešava i uštava; tu ĥaljosa duripnastyr, so me duminava.

³Tu dykhésa pirdál (skroz') miro drom i miro pasiben i saré miré dromá isyn džindlé Túke;

⁴pal-dová so iščo (inké) nane lav pe mirí čib, sob (kaj) Tu akaná te na džinesas mištés les.

⁵Tu oblyjan man palál i angíl, i Tyró vast isyn čhudo pe mánde.

⁶Dasavo Tyró džinybén pal mánde divinela man, davá isyn vučó godypén, mirí godý na dodžála ke davá.

⁷Karik me džáva krig Tyré Duhóstyr? Ci karik me keravpe Tyré jakhéndyr?

⁸Kóli me džáva ke Bolybnáskiro Rajo, Tu san odój; cji, kóli me keráva čhuibén dro liúno (prieispodnjo), ake, Tu san odój;

⁹Kóli me lávas zlokoskire phaká (krýly) i vurniavava te dživáv pe sámo morjoskiro (derjavéskiro) jagóro (krajo),

¹⁰až i odój Tyró vast lydžála man, i Tyró čačó (pravo) vast rikiréla man.

¹¹Kóli me phenavas: “Mek te učhakirel kalypén (ciamlypén) man, i mek te javél dud (svéto) ratiasa trusciál mánde;

¹²až i ciamlypén na garavela man Tútyr, i rat ziainela dyc'les syr dyvés: ciamlypén isyn dasavo — pac', syr dud.

¹³Pal-dová so Tu sozdyjan miré andratuné pašá, Tu čhudián khetané man dre miré-dakiri ločoví.

¹⁴Me javáva te parikiráv Túke, pal-dová so me som sozdynó divnes ke dar. Drieván dívna isyn Tyré butiá, i miro di džinéla mištés davá.

¹⁵Miré kokalý na sys ĥaradé Tútyr, kiéli me barijom te javav pe svéto dro garadó štéto, i kiéli man khuvenas dro jekhipén dro xor štéto.

¹⁶Tyré jakhá dykhné man, kiéli me sómas tyknó džidó i saré miré masengire pašá sys začhindlé dre Tyrí lylvarí; adiáke-pac' odój sys saré miré dyvesá, kiéli iščo (inké) ni jekh dyvés na sys.

¹⁷Ne syr dróga isyn mánge Tyré dúmy, o Dévla! Kicý but isyn len.

¹⁸Kóli me piriginavas len, len javélas butýr syr prahinki dro práho. Syr me džangadjovava, me saroiekh som Túsa.

¹⁹O, Dévla! Te muliakires Tu fujé manušén! Te džán krig mándyr tumé, savé isyn nahrata ke čúžo rat.

²⁰Jone rakiréna kirkes pal Túte, Tyré vérgi, jone ivjá (naprásnes) pričhuvena fuipén ke Tyró lav.

²¹O, Rajo Dévla! Ci me bidykhava odolén, savé bidykhena Tut? Ci na jačné džungalé (na brydindle) mánge odolé, kon ĥazdélape pe Túte?

²²Me bidykhava len saré iléstyr, jone jačné miré vergenca.

²³Rozdykh lačhés man, o Dévla i udžin miro iló; sprobin man i udžin, so me duminava;

²⁴i dykh, ci isyn, savó ž fuipén dre mánde, i lýdža man dro viéčno džiibén.