Read Biblija - Pe Baltitko Romani čib (Romanes) 2019 Baltic Romani Bible Psalmy 141 Bible Online

Psalmy 141 - Biblija - Pe Baltitko Romani čib (Romanes) 2019 Baltic Romani Bible bible

Psalmy 141

¹[140-r.s.] Davidóskiro Psálmo. O, Rajo Dévla! Me kharáva jasvénca Tut: jav sygedýr ke me; pričhúv kan ke mirí zan, kiéli me kharáva jasvénca Tut.

²Mek miro mangipén (modlo) te dodžal ke Tu sýrby fimiámo, a kiéli me ĥazdáva vastá sýrby bel'veliakiro svénto janybén.

³Čhuv stregaris, Rajo Dévla, pašýl miro muj, te rikirél vudár pe miré uštá.

⁴Na domek, sob (kaj) miro iló te risjol krig ke vari-savó čoro réndo, sob (kaj) me te keráv duredýr fuipén. Na domek, sob (kaj) me te xav manušéngire miziuli (slasti), savé keréna čoripén.

⁵Mek čačipnaskire manušá te pekaven man, davá javéla kuč. I mek jov te sykavél mirí bang, davá javéla sýrby olivítko dzet (jeliejo), savéstyr miro ramánjo (miro) na risjola krig; ne saroiekh me javáva te mangavape, sob (kaj) jone te na kerén čoripén.

⁶Kiéli léngire sendar'jen rozmarde pir bará, jone šunéna miré lavá, pal-dová so jone isyn gudlé.

⁷Amaré kokalý rosčhurdyne pašýl zagiibén dre maĥila (kula), sýrby, kiéli vari-kon pharavela phuv (pahinela) i čhinela kaštá pe phuv.

⁸Ne miré jakhá isyn pe Túte, o, Rajo Dévla, miro Raj Devél, dre Túte me zoralés patiáva: na domek, sob (kaj) miro di te xasjol.

⁹Rakh man vasténdyr, so čhudé feliá pe mánde, i feliá sietkása, savé keréna čoré manušá.

¹⁰Mek čoré manušá te perén dre léngire feliá pal jekh mólo, a me obdžava len.