Read Biblija - Pe Baltitko Romani čib (Romanes) 2019 Baltic Romani Bible Psalmy 145 Bible Online

Psalmy 145 - Biblija - Pe Baltitko Romani čib (Romanes) 2019 Baltic Romani Bible bible

Psalmy 145

¹[144-r.s.] Davidóskiro Šaribnytko Psálmo. Me javáva te šaráv ke vučipén Tut, miro Dévla, o Králi i me javáva te vyšarav Tyró lav usady (sak) i pe saré viéki.

²So dyvés me javáva te vyšarav Tut, i me javáva te šaráv Tyró lav usady (sak) i pe saré viéki.

³Drieván baró isyn Raj Devél i isyn mol, sob (kaj) zoralés te šarén Les, i léskiro baripén naštý te ĥaljon.

⁴Ródo rodóstyr javéna te šarén Tyré butiá i javéna te vyphenen statečnes (te ob'iavinen) pal Tyré-zoralypnaskire keribena.

⁵Me javáva te rakiráv pal slavútno patýv Tyré rajkané slavatyr i Tyré dívna ke dar butiá.

⁶I manušá javéna te rosphenén i pal Tyró zoralypén ke dar, Tyré butiendyr, i me javáva te vyphenav statečnes pal Tyré drieván baré réndy.

⁷I jone javéna te vyphenen i te ripirén pal Tyró baró lačhipén i me javáva te bagáv zoralés pal Tyró čačipén.

⁸Raj Devél isyn lačhedieskiro (milosno) i tangipnaskiro i, Jov nasyg xoliasóla, i isyn drieván lačhé-iléskiro.

⁹Raj Devél isyn lačhó ke saré, i léskiro drógo lačhipén isyn pe saró, so Jov sozdyjá.

¹⁰Saró, so Tu kerdián, javéla te parikirel Túke, o Rajo Dévla, i Tyré svénta javéna te šarén Tut.

¹¹Jone javéna te rosphenén pal Tyré-kralipnaskiri sláva i te rakirél pal Tyró zoralypén,

¹²sob (kaj) te džinén manušéngire čhavé pal Tyré-zoralypnaskire réndy i pal slavútno rajkany sláva Tyré kralipnastyr.

¹³Tyró kralipén — kralipén pir saré viéki, i Tu rikiresa zor pir saré ródy.

¹⁴Raj Devél podrikiréla sarén, kon peréla, i ĥazdéla saré odolén, savé bandine pharipnastyr.

¹⁵Saré manušéngire jakhá užakiréna lačhipén Tútyr, i Tu désa xabén lénge tedy, kiéli trej lénge.

¹⁶Tu roskeresa Tyró vast i désa čalés sareske, so isyn džidó.

¹⁷Raj Devél isyn čačipnáskiro dro saró, so Jov keréla i Jov isyn lačhó dro saré Léskire réndy (diély).

¹⁸Raj Devél isyn pašýl sarénde odolénde, savé kharéna Les čačipnása.

¹⁹Jov keréla pir odolengiro lav, pe iló, savénde isyn trašaibén angíl Léste i Jov javéla te šunél léskiro roviben i zrakhéla len.

²⁰Raj Devél prirakhela sarén, savénge isyn drógo Jov; ne Jov xasiakiréla sarén fujé manušén.

²¹Miro muj javéla te šarel Ras-Devlés i mek kažno loč (plot') te šarel léskiro Svénto lav usady (sak) i pe saré viéki.