Read Biblija - Pe Baltitko Romani čib (Romanes) 2019 Baltic Romani Bible Psalmy 147 Bible Online

Psalmy 147 - Biblija - Pe Baltitko Romani čib (Romanes) 2019 Baltic Romani Bible bible

Psalmy 147

¹[146-r.s.] Šarén Ras-Devlés! Pal-dová so isyn lačhés te bagán psalmy amaré Devléske; pal-dová so isyn drógo te šarén Les!

²Raj Devél ĥazdéla Jerusalimo, Jov kedela khetané odolén, savén vylydžiné Izrailjostyr.

³Jov sastiakirela odolén, konéste isyn pharó pe iló, i Jov piriphandela léngire fransy (rany).

⁴Jov ginéla, kicý isyn čergeniá, Jov kharéla len pir léngire lavá.

⁵Amaró Raj Devél isyn baró i drieván zoralypnaskiro, nane miéra pe Léskiro godypén.

⁶Raj Devél ĥazdéla kovlé-iléskire manušén, Jov čhurdéla telé fujé manušén ke phuv.

⁷Bagán Ráske-Devléske i parikirén Léske, bagán psalmy pe luta amaré Devléske:

⁸Kon učhakirdiá bolybén oblokénca, Kon kedela bryšýnd vaš phuv, Kon keréla adiáke, so čar barjola pe bérgi.

⁹Jov déla kheritkoné murdaleske léngiro xabén, i tykné korakénge (voroniatenge), savé déna gódla (ke Jov).

¹⁰Jov na radynélape zoralés greskire zorjátyr, Léske isyn na drógo muršeskiri zor dre ĥerá.

¹¹Léske isyn dróga odolé, savé daréna Léstyr, kodolé, savé užakiréna lačhipén Léskire kovlé-ilytkimatyr.

¹²[1] Šar Ras-Devlés, o Jerusalímie! Šar Tyré Devlés, o Siónie!

¹³[2] Pal-dová so Jov kerdiá zoralé šybiery pe tyrí pórta, Jov bahtiakirdiá tyré čhavén maškír Túte;

¹⁴[3] Jov déla ramánjo (miro) pe tyré kustyka (granicy), Jov déla čalés túke naj fedýr parnó giv.

¹⁵[4] Jov bičhavéla Péskire priphenybená pe phuv, léskiro lav prastala drieván sýges.

¹⁶[5] Jov déla iv syr pošom / výlna (šers'), Jov rosčhurdela iv syr práska (popielo).

¹⁷[6] Jov čhurdéla péskiro grado koterenca (kuskenca): kon saštý te pirilydžal léskiro šyl?

¹⁸[7] Jov bičhavéla léskiro lav i biladjola saró; Jov keréla adiáke, so Léskiri balvál phurdela i paniá thadena.

¹⁹[8] Jov phenéla statečnes Léskiro lav Jakovóske, Léskire, statúty (ustavy) i Léskiro čačipén Izrailjoske.

²⁰[9] Jov na kerdiá adiáke ni jekhe Najudytkoné nacyjake, pal-dová so jone na džinéna Léskire čačipená. Alliluia!