Read Biblija - Pe Baltitko Romani čib (Romanes) 2019 Baltic Romani Bible Psalmy 16 Bible Online

Psalmy 16 - Biblija - Pe Baltitko Romani čib (Romanes) 2019 Baltic Romani Bible bible

Psalmy 16

¹[15-r.s.] Davidoskiri Gilý. Davidoskiri Pátieri (Molítva). Prirakh man, Dévla, pal-dová so me garadjovava dre Túte.

²Me phendjom Ráske-Devléske “Tu san miro Raj Devél, saró miro kučipén isyn Tútyr.”

³Svénta devlýtka manušá pe phuv, savé isyn patiaibnytka, — lénge isyn mirí bari patýv,

⁴Odolé, savé risjona sýges ke javír devloré, barjakirena péskiri túga: Me na javáva te janav lénge svénto dyibén ratestyr, i me na javáva te vyphenav tituly léngire devlorengire.

⁵Rajo Dévla! Túte isyn saró, so me doresava, Tu désa saró sýrby kučikatyr, Tu rikiresa miré-džiibnáskiro taláno.

⁶Mirí phuv sys mierindly šelesa pir šukár štéty čačó, miro meknó mištypén radynela man.

⁷Me javáva te slavinav tut, Rajo Dévla, Savó sykliakiréla man; miro iló ratý podphenela mánge, karik me džáva,

⁸Me kažno mólo ripirava, so Tu san nádur; pal-dová so Tu san čačé rigátyr, me na javáva bi radymakiro.

⁹Paldavá miro iló isyn lošalo, i miro di radynélape; i mirí loč (plot') otkhinjola dre nadiéia.

¹⁰Daleske, so Tu zrakhésa man liunostyr (adostyr), Tu na désa patiaibnytkone dynaríske te kirnjol dre maĥila.

¹¹Tu sykavesa mánge drom ke džiibén: pal-dová so Tu san pašýl mánde, me drieván radynavape, mirí bari rádyma isyn dre Tyró čačó vast.