Read Biblija - Pe Baltitko Romani čib (Romanes) 2019 Baltic Romani Bible Psalmy 18 Bible Online

Psalmy 18 - Biblija - Pe Baltitko Romani čib (Romanes) 2019 Baltic Romani Bible bible

Psalmy 18

¹[17-r.s.] Xoróskire Dirižoróske. Davidóskiro Psálmo, kon isyn Ráskire-Devléskiro Pishári, savó vyphendia bagaibnytka lavá Ráske-Devléske dro dyvés, kiéli Raj Devél zrakhciá Les léskire-vergéngire vergéngire vasténdyr i Saulóskire vastéstyr.

²I phendiá jov: “Me rikirava syr Drógima Tut dro iló, Rajo Dévla, Tu désa zor mánge.

³Rajo Dévla, Tu san mirí bérga i mirí” tvárdyma/diz (kriepost'). Kon zrakhéla man, Miro Dévla, Tu désa zor mánge; i dre Túte me ĥaradjovava. Tu san miro ščýto, Savó zrakhéla man, Savó zaterdjola pal mánde.

⁴Me kharáva Ras-Devlés, Savó zrakhéla man miré vergéndyr, Saves trej te šarén.

⁵Meribnaskiri dar isyn trusciál mánde, pal-dová so baré nadevlytka valny (velny) trašade man.

⁶Darja (dara) isyn liunostyr (adostyr) trusciál mánde, meribnaskire feliá oblyne man.

⁷Kiéli mánge jaciá pharó, me khardjom Ras-Devlés i rondjom zaniása angíl miré Devléste: Jov šundiá mirí zan telál Péskire štetóstyr dro Bolybnáskiro Rajo, Jov šundiá mirí godlyma.

⁸Tén'ci phuv trinskirdiape i izdrandyja, telatuné bará bergendyr khardepe (dvigindlepe) i izdrandyne, pal-dová so Devél xoliásyja.

⁹Thuv ĥazdyjápe Léskire ruthuniéndyr (nozdriendyr), jag i vangara, so roshačonas usá butýr Léskire móstyr.

¹⁰I Jov bandiakirdia bolybén i gijá telé, kalypén (ciamlypén) sys angíl Léskire ĥerá.

¹¹Jov besciá pe xieruvimo i vurniandyja, i Jov vurnialas pe bel'veliakire phaká.

¹²I Jov zakerdia ciamlypnasa ĥensta bolybnáskire óbloki, so sys pherdé paniésa, savé sys trusciál Léste.

¹³Jarko dud ziainelas angíl Léste, grado barénca i vangara, so xačonas, vyuhtenas oblokendyr.

¹⁴I Raj Devél adiáke-pac' phendiá dro gromo, i Naj Vučedyreskiro vyphendia péskire zaniása, gradoskire barénca i vangarenca, so xačonas.

¹⁵Jov vymekcia péskire maribnýtka bestiá i rosčhurdyja miré vergén, i Jov dyjá kar'je bliskavicenca i rosčhurdyja vergén, so jone našéna.

¹⁶Tedy panieskire dugny (dniščy) jačné dyc'le (bicialé), i tel-phuvjákiro fundámiento otčhakirdiape, kiéli Tu, Rajo Dévla, dyjá gódla darakunes, syr Tu phurdyjan zoralés Péskire ruthuniendyr.

¹⁷Raj Devél dogijá vyčipnastyr, uhtyldia man, Jov tyrdyja javrí man baré paniendyr;

¹⁸Jov zrakhciá man miré zoralé vergostyr, i odoléndyr, savé drieván na vyrikirde man, pal-dová so jone sys zoraledýr mándyr.

¹⁹Jone terdiné angíl mánde dro dyvés, syr sys bibáht mánge, ne Raj Devél sys pe mirí rig.

²⁰Jov vylydžijá man pe buĥló štéto, Jov zrakhciá man, pal-dová so Léske isyn drógo me.

²¹Jov otdyjá pale lačhipnása pal miro čačipén; Jov bahtiakirdiá man pal dová, so me sómas bibangipnaskiro.

²²Pal-dová so me rikirdjompe ke čačipén, so Raj Devél phendiá, me na otrisijom Devléstyr te keráv fuipén.

²³Me kerdjom pir saré Léskire priphenybená, me na otphendjompe Léskire statutendyr,

²⁴Pal-dová so me som bidošéngiro angíl Léste, i me rakhcjom pes, sob (kaj) te na keráv fuipén.

²⁵Raj Devél bahtiakirdiá man pal miro čačipén, pal dová, so me sómas bibangipnaskiro angíl Léskire jakhá.

²⁶Lačhé-ileskirenca Tu san lačhé-iléskiro, bidošengirenca Tu san bidošéngiro;

²⁷Čystone-ileskirenca Tu san lačhó; frentonenca Tu san godiása pe stréga,

²⁸pal-dová so Tu zrakhésa odolén, kon stradynela. Ne Tu bandiakiresa odolén, kon ĥazdéla nakh.

²⁹Tu zahačkiresa mirí lampa: Raj Devél, miro Dévla, Tu zaziainesa jagása i ciamlypén udžala.

³⁰Tu désa zor mánge te džav angíl maribnytkoné xaladénde, Miré Devlésa me piriuhtava foritko bar.

³¹Miro Devél isyn bidošéngiro, Ráskire-Devléskiro lav isyn propatiakirdo. Jov isyn ščýto vaš sarénge, kon garadjola dre Léste.

³²Kon tedy isyn Devél apríč Raste-Devléste. Ci, kon ža isyn Bérga te zrakhelpe apríč amaré Devléste?

³³Devél déla mánge zor i keréla mánge mamúj (priámo) drom,

³⁴Jov keréla miré ĥerá syr olienieste, Jov čhuvéla man pe vučé štéty;

³⁵Jov sykliakiréla miré vastá vaš maribén, sob (kaj) miré vastá te nadtyrden xarkuno lúko.

³⁶Tu dyján adiáke-pac' mánge ščýto te zrakhavpe i Tyró čačó vast podrikiréla man, i Tyró lačhipén dyjá mánge zor.

³⁷Tu kerdián buĥló drom mánge te štavav.

³⁸Me tradyjompe dre šale (pagonia) pal miré vergénde i uhtyldjom len; i me na risijom, angíl, syr me te xasiakiráv len.

³⁹Me pirimardjom len, so jone naštý te uštén: i jone perenas tel miré ĥerá.

⁴⁰I Tu dyján mánge zor vaš maribén. Tu bandiakirdian miré vergén angíl mánde.

⁴¹I Tu poriskirdian meniasa miré vergén te našén, sob (kaj) me te xasiakiráv odolén, savé bidykhena man.

⁴²Jone dyné gódla, ne nikón na sys te zrakhél, jone dyné gódla Ráske-Devléske, ne Jov na otphendiá lénge.

⁴³Tén'ci me rostasadjom len syr práho angíl balvalia, štakurdjom len syr bláta pe gásy.

⁴⁴Tu zrakhcián man manušéndyr, savé buntuinena, Tu čhudián man šeré manušésa pe Najudýtka nácyi. Manušá, savén me na džindjom angíl, javéna te dynarinén mánge.

⁴⁵Syr féni jone šunéna pal mánde, jone kandéna man, čhavé, namire-manušéngire, bandiakirena šeré angíl mánde.

⁴⁶Čužone-manušéngire čhavé jačéna zlomka i jone vydžána péskire baruné rikiribnendyr, izdraindoj.

⁴⁷Te dživél Raj Devél! Te javél bahtiakirdy mirí Bérga te zrakhavpe! Te šarel vučés saró, so isyn džidó, Devlés, Savó zrakhéla man.

⁴⁸Jov isyn Devél, Savó otdéla pale vergénge pal mánde, Savó pomoginela te lav upralypén pe manušénde;

⁴⁹Jov zrakhéla man miré vergéndyr: čačó, odoléndyr, savé džána proti mánde. Tu zrakhcián man nahratone (nahal'none) manušéndyr.

⁵⁰Paldavá me parikirava, but móly Túke, Rajo Dévla, angíl Najudýtka nácyi i me javáva te bagáv giliá Tyré lavéske.

⁵¹[r.s.] Davá isyn Jov, Kon zrakhéla Péskire kralís, Savó sykavéla láska odoléske, konés Jov pomakhcia Davidóske, i léskire rodóske pe saré viéki”.