Read Biblija - Pe Baltitko Romani čib (Romanes) 2019 Baltic Romani Bible Psalmy 22 Bible Online

Psalmy 22 - Biblija - Pe Baltitko Romani čib (Romanes) 2019 Baltic Romani Bible bible

Psalmy 22

¹[21-r.s.] Xoróskire Dirižoróske. Pe zlóko (ránko), angíl, syr Dyvesjola. Davidóskiro Psálmo.

²Miro Dévla, Mro Devlale! Sóske Tu mekcian man, sóske Tu san durál te des vast mánge, kiéli Me dáva ĥondiá (ŭzdyhinava) pharipnastyr.

³O, Miro Dévla! Me dáva gódla dyvesé, ne Tu na otphendian mánge, i ratý — nane spokojo mánge.

⁴Ne Tu san Svénto, Tu san beštó pe Izrailjoskiro trono syr Králi.

⁵Amaré dadá patiandyné dre Túte; jone patiandyné i Tu zrakhcián len.

⁶Jone dyné gódla ke Tu te pomogines, i jone sys zrakhné. Jone patiandyné dre Túte, i jone na sys ladžakirdé.

⁷Me som kirmo, a na som manúš; manušá xoliames obrakirena man, manušýtka nácyi ginéna man pal bláta.

⁸Saré, kon bidykhela man, sanape xoliames mándyr; jone kuniakirena (kačynena) šerenca i rakiréna:

⁹“Jov dopatiandyja péskiro džiibén Ráske-Devléske, mek Jov te podel vast léske bidatyr: mek Jov te zrakhél les, pal-dová so Jov radynélape Lésa.”

¹⁰Ne davá ž san Tu, Kon vylyja man dákire ločoviátyr (perestyr), davá Tu čhudián man te javav kuč pašýl dákire ciucia.

¹¹Me sómas otdynó Túke tedy, kiéli me lahtjompe, Tu san miro Devél dákire perestyr.

¹²Na jav dur mándyr, syr me piridživava, syr nane nikón te del vast mánge.

¹³But vérgi syr guruva terdiné trusciál mánde; zoralé guruva Vasanostyr obštade man.

¹⁴Jone porade péskire muiá pe mánde, syr ščerá (lievy), so isyn ĥalka (korysna) te roskušen.

¹⁵Me vyčhudjom péskiri zor syr paní, i saré miré kokalý rospynepe pe koterá, miro iló isyn syr mom, so rozbiladyja andrál miro kužum (želudko).

¹⁶Mirí zor vyšutija syr kotér ĥlejatyr (glinatyr), i Mirí čib prilipnindia ke miré žandy. Tu čhudián man dre meribnaskiri bláta.

¹⁷Pal-dová so džukela obgine trusciál mánde; xievra čoré-manušéngiri obgija man rigéndyr; jone prophusade miré vastá i ĥerá.

¹⁸Me poginava saré miré kokalý; vergarja ž dykhéna, jone putravena jakhá pe mánde.

¹⁹Jone roskerena miré ídi (rizy) maškír péste, jone čhurdena žrebijo pe miré uribená.

²⁰Rajo Dévla! Tu na durjov mándyr — Zoralypén miro, jav sygedýr te del vast mánge!

²¹Zrákh miro di kurtalátyr, miro jekhoro džiibén džuklengire lapendyr.

²²Na domek man ke ščerengire pasti; vyle man busone (dikone) guruvengire šyngendyr (rogendyr).

²³Me javáva te vyphenav Tyró lav miré pšalénge, Me javáva te šaráv Tut maškirál manušénde, savé skedénape te kloninenpe patyvása Túke.

²⁴Tumé, savé daréna Rástyr-Devléstyr, kloninenpe patyvása Léske! Jakovóskiro ródo, slavinén Les. Saró Izrailjoskiro ródo, darén Léstyr.

²⁵Pal-dová so Jov na dykhciá vučipnástyr, i risija ke stradyndle manušá, kiéli sys pharó; i Jov na otrisija léndyr, ne kiéli jone dyné gódla Léske, te del vast, Jov šundiá.

²⁶Me javáva te šaráv Tut pe baró skedyibén; me keráva dová, pal so me sovlahadjom angíl odolénde, savé daréna Léstyr.

²⁷Mek te xan čalés odolé, savé xána mén'ki, a odolé, savé rodéna Ras-Devlés, javéna te šarén Les, mek te dživén tumaré ile pe saré viéki!

²⁸Saré jagóry (kraí) phuvjákire javéna te ripirén, i te risjon ke Raj Devél, i saré Najudýtka ródy pokloninenape patyvása Túke.

²⁹Pal-dová so saró kralipén isyn Ráskire-Devléskiro; i Jov kralinela pe manušýtka nácyi.

³⁰Saré thule barvalypnastyr pir phuv javéna, te xan i pokloninenape patyvása; a saré odolé, savé zdžana dro práho, javéna te bandjon šerenca angíl Léste.

³¹Manušéngire ródy, so javéna angíl, javéna te dynarinén Léske: manušá javéna te rakirén pal Raste-Devléste vaš javír ródy.

³²[r.s.] Jone javéna i phenéna pal léskiro čačipén manušénge, savé iščo (inké) lathenape, so Jov kerdiá.