Read Biblija - Pe Baltitko Romani čib (Romanes) 2019 Baltic Romani Bible Psalmy 25 Bible Online

Psalmy 25 - Biblija - Pe Baltitko Romani čib (Romanes) 2019 Baltic Romani Bible bible

Psalmy 25

¹[24-r.s.] Davidóskiro Psálmo. Túke, Rajo Dévla, me kloninavape patyvása.

²O miro Dévla! Me patiáva dre Túte; na domek, sob (kaj) te javél ladžavo mánge, sob (kaj) miré vérgi (vrogi) te na len vučipén pe mánde!

³Te na javén adiáke-pac' ladžakirdé odolé, savé rikiréna nadiéia pe Túte. Ne te javén ladžakirdé odolé, savé buntuinena bi pričynakiro.

⁴Rajo Dévla, sykáv mánge Tyró drom, sykliákir man Tyré čačipnaske.

⁵Lýdža man te keráv pir Tyró čačipén, sykliákir man, pal-dová so Tu san Devél, Savó zrakhéla; pe Túte isyn nadiéia so dyvés mánde.

⁶Priripir, Rajo Dévla, Péskiro tangipén i lačhé-ilýtkima, pal-dová so jone džána viekenca.

⁷Na priripir, syr me ternó phagirdjom Devléskiro Zakóno i kerdjom gréhi, pal-dová so Tu san lačhó ke manušá, priripir pal mánde, Rajo Dévla, Tyré lačhé-ilytkimatyr.

⁸Raj Devél isyn lačhó i čačipnáskiro; paldavá Jov javéla te sykliakirén grehitkoné manušén te džán čačuné dromésa:

⁹Jov lydžála ke čačipén odolén, savé xána mén'ki, Jov sykliakiréla len te džán čačuné dromésa:

¹⁰Raj Devél lydžála péskire dromésa odolén, savé prirakhena Léskiro Zakóno i priphenybená, lačhé-ilytkimasa i čačipnása.

¹¹Vaš Tyró lav, Rajo Dévla, otmek mirí bang, pal-dová so joj isyn drieván bari.

¹²Savó isyn manúš, kon daréla Rástyr-Devléstyr! Léstyr jov vysykljola drom, so léske trej te vykedel.

¹³Léskiro di jačélape bahtaló, a Léskire čhavénge javéla phuv syr meknó mištypén.

¹⁴Raj Devél Péskiri sykavéla garady láska odolénge, savé daréna Léstyr. Jov sykliakiréla len pal Péskiro Zakóno.

¹⁵Me kažno mólo dykháva pe Raste-Devléste, pal-dová so Jov vyterdela miré ĥerá feliatyr.

¹⁶Podykh pe mánde i tangine (požalin) man, pal-dová so me som jekhdžinó i xava mén'ki.

¹⁷Pharipén pe iló jaciá butedýr: vylydža man miré baré darátyr.

¹⁸Podykh, syr me xava mén'ki i pe miré dukhá, i otmek saré miré gréhi!

¹⁹Podykh, syr but isyn vérgi pašýl mánde, syr jone bidykhena man kalé ilésa.

²⁰Prirakh miro di i zrákh man, sob (kaj) me te na javav ladžakirdó, pal-dová so me garadjovava pal Túte.

²¹Mek miro lačhipén i čačipén te prirakhen man, pal-dová so mánde isyn nadiéia pe túte.

²²Zrákh, Dévla, Izrailjo saré léskire pharipnendyr.