Read Biblija - Pe Baltitko Romani čib (Romanes) 2019 Baltic Romani Bible Psalmy 26 Bible Online

Psalmy 26 - Biblija - Pe Baltitko Romani čib (Romanes) 2019 Baltic Romani Bible bible

Psalmy 26

¹[25-r.s.] Davidóskiro Psálmo. Priĥaljov miro nabangipen pe séndo, Rajo Dévla, pal-dová so me lydžijom lačhó džiibén, me adiáke-pac' patiandyjom dre Raste-Devléste i me na obštavavaspe.

²Propatiakir man, o Rajo Dévla, i sprobin man, žužakir mirí godý i miro iló.

³Pal-dová so Tyrí lačhé-ilýtkima isyn angíl miré jakhá. I me dživdjom pir Tyró čačipén.

⁴Me na sómas beštó xohané manušénca, i me na sómas khetané dujemujengirenca.

⁵Mánge sys na pir iló, kaj skedénape fuj manušá, i me na sómas beštó khetané fujé manušénca.

⁶Me vymorava vastá te sykavav, so me na som bangó, sob (kaj) mánge te obdžal trusciál Tyró altárjo, o Rajo Dévla,

⁷te parikiráv zoralés Túke i te phenáv pal Tyré dívna butiá.

⁸O, Rajo Dévla, mánge jaciá pir iló gožypen, kaj Tu dživesa i štéto, kaj Tyrí sláva isyn.

⁹Na xasiakir miro di khetané grehitkoné manušénca, ci miro džiibén khetané odolenca, savé pročhuvena manušéngiro rat,

¹⁰koneskire vastá kerdé bidy, i dro konéskiro čačó vast isyn but myty.

¹¹Ne me javáva te lydžav džiibén; zrákh man i tangine man.

¹²Mirí ĥerój isyn terdy pe vórto (roŭno) štéto, me javáva te slavinav i te parikiráv Ráske-Devléske, kaj manušá skedénape te mangénpe Devléske.