Read Biblija - Pe Baltitko Romani čib (Romanes) 2019 Baltic Romani Bible Psalmy 34 Bible Online

Psalmy 34 - Biblija - Pe Baltitko Romani čib (Romanes) 2019 Baltic Romani Bible bible

Psalmy 34

¹[33-r.s.] Davidóskiro Psálmo, kiéli Jov parudia pes pe bigodiakire Manušéste angíl Avimieliehoste, savó tradyjá les krig i Davído gijá péske.

²Me javáva te slavinav, te parikiráv Ráske-Devléske saró časo, me javáva ŭsády/sak (usiegda) te šaráv Les miré ušténca.

³Miro di javéla te šarelpe Rása-Devlésa. Manušá, savé xána mén'ki, šunéna pal davá i javéna te radynénpe.

⁴Šarén i slavinén Ras-Devlés mánca, javása khetané te barjakiras Léskiro lav.

⁵Me mangdjompe Ráske-Devléske i Jov otphendiá mánge, i Jov zrakhciá man miré trašaibnendyr.

⁶Jone, savé stradyndle, dykhné pe Léste i jone ziaindle radymátyr, i léngire muiá na sys ladžakirdé.

⁷Čororó manúš khardiá Les i Raj Devél šundiá, i zrakhciá les saré léskire pharipnendyr.

⁸Léskiro Jangólo obdžala trusciál i rakhéla sarén, konéste isyn trašaibén angíl Raste-Devléste i zrakhéla len.

⁹Šunén, sob (kaj) te udžinén, syr Raj Devél isyn lačhó; te javél bahtiakirdó adavá manúš, kon garadjola pal Léste.

¹⁰O, tumé svénta, mek te javél trašaibén tuménde angíl Raste-Devléste, pal-dová so odolénde, savénde isyn trašaibén angíl Léste, na javéla trébima ni dro so.

¹¹Terné ščerorende (lievicende) isyn trébima i jone xána mén'ki bokhátyr, ne odolé manušénde, savé garadjona pal Raste-Devléste, na javéla trébima ni dro so.

¹²Javén, miré čhavale, šunén man. Me sykliakirava tumen pal dová, sob (kaj) te javél dasavo trašaibén angíl Raste-Devléste.

¹³Konéske isyn drógo džiibén i konéske isyn drógo te dykhél lačhé dyvesá?

¹⁴To obrikires péskiri čib fujé lavéndyr i péskire uštá xohané lavéndyr;

¹⁵rakh pes te kerés fuipén, ker lačhipén; róde ramánjo (miro) i prilé zor te lathes Les.

¹⁶Ráskire-Devléskire jakhá dykhéna pal čačipnaskire manušénde, i léskiro kan isyn otphandlo, syr jone déna gódla ke Jov.

¹⁷Raj Devél otriskirela Péskiro muj odoléndyr, kon keréla čoripén, sob (kaj) te otčingirelpe ripiribén pal lénde phuvjátyr.

¹⁸Patiaibnaskire manušá kharéna Ras-Devlés i Jov šunéla, I Jov zrakhéla len saré léngire pharipnastyr.

¹⁹Raj Devél isyn pašýl odolénde, savénde isyn pharó pe iló, i Jov zrakhéla odolén, kon dandyrela péskiro iló pal grého.

²⁰Čačipnaskire manušá stradynena but, ne Raj Devél pomoginela lénge dro saró davá.

²¹Jov rakhéla saré léngire kokalý, nijékh léndyr isyn na phagno.

²²Fuipén muliakiréla fujé manušén, i odolé, savé bidykhena čačipnaskiren, peréna tel kára.

²³[r.s.] Raj Devél zrakhéla léskire-dynar'jengire dijá i odolé, savé garadjona pal Léste, na javéna bangé.