Read Biblija - Pe Baltitko Romani čib (Romanes) 2019 Baltic Romani Bible Psalmy 37 Bible Online

Psalmy 37 - Biblija - Pe Baltitko Romani čib (Romanes) 2019 Baltic Romani Bible bible

Psalmy 37

¹[36-r.s.] Davidóskiro Psálmo. Na de jakhalo (na zavidyn) zoralés odolénge, savé keréna čoripén, na zevlyn kodolénge, kon keréla pefromi fuipén,

²pal-dová so jone zašutjona syr čar, i jone murdaljona (zavianinena) syr zeleny raslina.

³Dopatia Ráske-Devléske i ker lačhipén, dživ pe phuv i prirakh čačipén.

⁴Bahtaljov kuč mištypnasa Rástyr-Devléstyr, sob (kaj) Jov te del tuménge, so tyró iló drieván užakiréla.

⁵Dopatia péskiro Ráske-Devléske i garadjov pal Léste i Jov keréla saró,

⁶I Jov vylydžala tyró čačipén pe dud (svéto) te ziainel, i tyró patiaibén syr kham dro paš-dyvés.

⁷Jav štyl angíl Raste-Devléste, užakir, paka Raj Devél zaterdjola, na xoliasov zoralés pe odoléste, savéske isyn mištó te dživél, i pe odoléste, kon duminéla te kerél fuipén.

⁸Rakh pes dre rig xoliátyr i jačkir xoliakiribén, na xačov xoliása te kerés čoripén.

⁹Odolén, savé keréna čoripén, na javéla syg, a kodolé, savé užakiréna Ras-Devlés, doreséna phuv syr dáro.

¹⁰Iščo nábut, i na javéla odolén, savé keréna fuipén. Dykhena nábut pe léngiro štéto i nane len.

¹¹A kovlé-ilýtka manušá doreséna phuv syr dáro, i jone javéna te bahtaljon ramanjóstyr (mirostyr), so na končynelape.

¹²Fuj manúš duminéla fuipén pe čačuneste i skriežynela dandenca pe léste.

¹³Raj Devél salape léstyr, pal-dová so fujé-manušéskiro dyvés javéla sýges vaš xasibén.

¹⁴Fuj manušá vytyrdyne péskiri kurtála i bandiakirde péskiro lúko te den kar'je, sob (kaj) te raven čororen i odolén, savé stradynena, sob (kaj) te zamarén odolén, kon džála pir čačipnáskiro drom:

¹⁵léngiri kurtála promarela léngiro iló i léngire luki phadjona.

¹⁶Dová nábut, so isyn čačuné manušéste, fedýr barvalypnastyr, so isyn fujé manušénde;

¹⁷pal-dová so léngire mardytka javéna phagirdé, a Raj Devél podrikiréla čačuné manušén.

¹⁸Raj Devél dykhéla pal bidošengire manušénde i léngiro mištypén javéla pe saré viéki:

¹⁹jone na javéna ladžakirdé dre pharé dyvesá, jone javéna čale dre bokhalé beršá.

²⁰Ne fuj manušá xasjona i Ráskire-Devléskire vérgi syr feldakiro šukaripén, syr thuv xasjona.

²¹Fuj manúš léla lové dro dlugo i nijékhvar na déla pale, čačipnáskiro manúš tanginela (žalinela) i déla.

²²Pal-dová, so odolé, savén Devél bahtiakirdiá, léna phuv syr meknó mištypén, a odolé, savén Devél prokoscia, javéna vyčhurdyne te xasjon.

²³Raj Devél zorjakirela manušés te štavel pirenca (stopenca), Jov drieván radynélape, syr adavá manúš dživéla:

²⁴mek jov i obštavelape, ne saroiekh jov na javéla čhurdynó te xasjol, pal-dová so Raj Devél podrikiréla Les pal vast.

²⁵Me sómas ternó i kakaná me som phuró i me nijékhvar na dykhcjom, sob (kaj) Raj Devél te mekel čačuné manušés, ci sob (kaj) léskire čhavoré te mangén maró syr bógi.

²⁶Jov žalinela i déla dro dlugo (vužlypén) manušénge, a léskire čhavoré isyn bahtiakirde.

²⁷Risjov krig čoripnástyr i ker lačhipén, i tu javésa te dživés manušanes pe phuv;

²⁸pal-dová so Ráske-Devléske isyn drógo čačipén i Jov na mekéla Péskire devlytkonen. Jov usady (sak) rakhéla len, a fujé-manušéngire čhavoré javéna čhurdyné te xasjon.

²⁹Čačuné manušá doreséna phuv syr meknó mištypén i javéna te dživén pe láte saré viéki.

³⁰God'varé-manušéskiro muj rakiréla godypén i léskiri čib rakiréla čačipén,

³¹léskire-Devléskiro Zakóno isyn dro léskiro iló, léskire piré (stópy) na obštavenape (slizninenape).

³²Fuj manúš dykhéla ciamkes pal čačuné manušéste i rodéla te zamarél les:

³³Raj Devél na jačkiréla čačunés dre léskire vastá, Jov na déla te bangiakiren les, kiéli jov javéla pe séndo.

³⁴Rikir nadiéia pe Raste-Devléste i prirakh Léskire uphenybená i Jov barjakiréla ke vučipén tut, sob (kaj) tu te priles phuv syr meknó mištypén: tu dykhésa, kiéli fuj manušá javéna čhurdyné te xasjon,

³⁵Me dykhcjom fujé manušés baré zorjása, savó rozbarjolaspe sýrby zeleno kašt (drévo) pe péskiri kuč phuv:

³⁶ne javdiá časo léskiro i, ĥáda, nane butýr les. Me rodavas les i na lathjom.

³⁷Pridykhpe vaš primiéro (sykaibén) ke bidošéngiro manúš i dykh pe čačuné manušéste, pal-dová so štyle manušéste, savó tyrdelape ke ramánjo (miro), javéna patomki.

³⁸Odolé, savé phagirena Devléskiro Zakóno, javéna muliakirdé khetané, a čoré-manušéngire čhavoré, javéna čhurdyné te xasjon.

³⁹Raj Devél zrakhéla čačipnaskire manušén: Jov déla zor lénge, kiéli isyn pharó.

⁴⁰I Raj Devél déla vast lénge i zrakhéla len: Jov vytyrdela len fujé manušéndyr i zrakhéla len, pal-dová so jone garadjona pal Léste.