Read Biblija - Pe Baltitko Romani čib (Romanes) 2019 Baltic Romani Bible Psalmy 39 Bible Online

Psalmy 39 - Biblija - Pe Baltitko Romani čib (Romanes) 2019 Baltic Romani Bible bible

Psalmy 39

¹[38-r.s.] Xoróskire Dirižoróske. Idifimoske (Jeducynoske). Davidóskiro Psálmo.

²Me phendjom: “Me javáva te dykháv, so me keráva, sob (kaj) mánge te na keráv grého miré čibása (čibjasa): me javáva te rakhav miro muj kagancosa (namordnikosa), paka fuj manúš terdó angíl mánde”.

³Me jacjom laló (niémo), me som štyl, me až sómas štyl pal lačhipén, i miro dúho (fáno) pyjá butýr dro konfuzo.

⁴Miro iló roshačija dre mánde, kiéli me dyjom godý péske (xor dumindjom), zahačíia jag dre mánde, me phendjom miré čibása;

⁵O, Rajo Dévla, phen mánge, kiéli miro džiibén končynelape i pal kicý dyvesá me meráva. So isyn dasavo: phen mánge, kicý beršá mánge iščo (inké) te dživáv?

⁶Ĥáda, féni pe buĥlypén miré-vasteskiro Tu dyján mánge dyvesá te dživáv i miro džiibén isyn krotko časo, sýrby nisó angíl Túte. Davá isyn patiaibén, so kažno (sváko) manúš, mek jov te terdjol vučés, isyn balvaliakiro phurdypen. Séla.

⁷Davá isyn čačó, so manúš psiréla sýrby jekh zer (tienjo), čačó, jov čhurdelape ivjá (naprásnes); jov skedéla péske, a na džinéla, kon zalela davá.

⁸A kakaná, so mánge te užakirav, Rajo Dévla? Me užakirava lačhipén Tútyr.

⁹Zrákh man saré miré čoripnástyr, na domek, sob (kaj) dylynó manúš te obrakirel man.

¹⁰Me sómas laló, me na otphandjom miro muj pal-dová, so Tu adiáke kerdián.

¹¹Le mándyr krig dukhá, so Tu čhudián pe mánde: me meráva, syr Tu marésa man Tyré vastésa.

¹²Tu sykliakiri i désa kara (xas') i sykavesa bang manušente pal léngiro čoripén, Tu xasiakiresa, syr mol' dová, so jov kaméla; čačó, kažno manúš isyn syr balvalitko phurdypen. Séla.

¹³Šun mirí pátieri (molítva), o Rajo Dévla, i pričhúv kan, so me rovava, na jav štyl miré jasvendyr, so me som čúžo manúš Túke, savó lodela, syr sys miré dadá.

¹⁴[r.s.] Otriskir mándyr Péskire strénga jakhá, i me javáva te radynavpe angíl, syr me džáva krig péske i man na javéla butýr.