Read Biblija - Pe Baltitko Romani čib (Romanes) 2019 Baltic Romani Bible Psalmy 4 Bible Online

Psalmy 4 - Biblija - Pe Baltitko Romani čib (Romanes) 2019 Baltic Romani Bible bible

Psalmy 4

¹Xoróskire Dirižoróske. Pe balytka Strumiénty. Davidóskiro Psálmo.

²Kiéli me kharáva, otphen mánge, Dévla pal miro čačipén: mánge sys pharó. Tu pomogindian mánge: potangine man i pošun miro mangipén Devléske.

³Manušýtka čhavale! Ci but javéna tumé te obrakiren mirí sláva? Ci but tumé javéna te vykeden xohanó čačipén? Ci but tumé javéna te terdenpe ke frentyma? Séla.

⁴Ne džinén, so Raj Devél čhudiá dre rig vaš Péske devlytkoné manušén: Raj Devél šunela man, kiéli me kharáva Les.

⁵Izdran i na kerén gréhi; rozlen péskire ilésa pe tumaró čhuibén i javén štyl (tiha). Séla.

⁶Janén svénta dyibená čačipnastyr i dopatian Ráske Devléske.

⁷But manušá rakiréna: “Kon sykavéla aménge vari-savó lačhipén?” Ĥazde Péskre-Moskiro dud pe aménde, Rajo Dévla!

⁸Tu dyján rádyma miré ileske butýr, syr jone radynénape aplodostyr pe giv i vinagrado.

⁹Me pasjovava dro spokojo i so som sutó, pal-dová so Tu san Jekhdžinó, Rajo Dévla, Savó désa mánge te dživáv bidarakires.