Read Biblija - Pe Baltitko Romani čib (Romanes) 2019 Baltic Romani Bible Psalmy 42 Bible Online

Psalmy 42 - Biblija - Pe Baltitko Romani čib (Romanes) 2019 Baltic Romani Bible bible

Psalmy 42

¹[41-r.s.] Xoróskire Dirižoróske. Sykliakiribén Kariejeskire Čhavéndyr.

²Syr mirga (lan') drieván kaméla paní, savó thadéla, adiáke-pac' dro miré dúho (fáno) isyn smega / truš (žažda) ke Tu, o Dévla.

³Miro dúho (fáno) isyn dre truš (smeginela) pal Devléste Zoraleste, Džiibnáskire Devléste: kiéli me džáva i sykadjovava angíl Devléste?

⁴Miré jasva sys mánge syr xabén dyvés i rat, kiéli jone rakirdé mánge so dyvés: “Kaj isyn tyró Devél?”

⁵Kiéli me priripirava davá, tedy me phagirava peskro iló: syr me psirdjom maškír buté manušénde, syr me lydžavas len ke Devléskiro Kher i davas gódla radymátyr i šaribnastyr manušytkoné skopostyr, savé svenkinenas.

⁶O miro di, sóske tu tuginesa i izdrasa dre mánde? Užakir lačhipén Devléstyr; i me javáva te parikiráv Léske, Kon zrakhciá man.

⁷O, miro Dévla, miro di isyn dre túga dre mánde; me priripirava pal Túte Iordanoskire phuvjátyr, Garmonoskire vučipnendyr, Mizaroskire bergátyr.

⁸Xoripén prikharela xoripén lopotymasa, syr paniá peréna, saré Tyré valny (velny) i paningá, so kuniakirenape, giné upré vučedýr mándyr.

⁹Raj Devél déla Léskiri lačhé-ilýtkima dyvesé, a ratý me bagava gilý Léske i me mangavape Devléske, miré Džiibnaskireske.

¹⁰Me phenáva Devléske, miré Bergake: “Sóske Tu bistyrdian pal mánde? Sóske me psirava i izdrava, kiéli vérgo tasavela man.

¹¹Miré vérgi obrakirena man adiáke, so až miré kokalý pharadjona, kiéli jone rakiréna mánge so dyvés: “Kaj isyn tyró Devél?

¹²[r.s.] Sóske tu tuginesa, miro iló? Sóske tu izdrasa andré mánde? Užakir lačhipén Devléstyr, i me javáva te šaráv Les, Kon zrakhciá man.