Read Biblija - Pe Baltitko Romani čib (Romanes) 2019 Baltic Romani Bible Psalmy 45 Bible Online

Psalmy 45 - Biblija - Pe Baltitko Romani čib (Romanes) 2019 Baltic Romani Bible bible

Psalmy 45

¹[44-r.s.] Xoróskire Dirižoróske. Sykliakiribén. Kariejoskire Čhavéndyr. Bjaveskiri Gilý.

²Miro iló isyn pherdó bahtalé lavénca: me rakiráva pal kralískire réndy, mirí čib isyn syr lačhé-čhinybnariskiro destoro (trost').

³Tu san naj šukaredyr manušypaskire čhavéndyr, bahtalypén vyčhudiape tyré uštendyr: pal-dová so Devél bahtiakirdiá tut pe saré viéki.

⁴Phande trusciál péskiri kurtála ke péskiri ĥerój (bjodro), murš baró, péskire slavása i baré vučedyripnasa,

⁵i trade uklisté mištés péskire baré vučedyripnasa te zaterdjos pal patiaibén, kovlé-ilýtkima i čačipén, a tyró čačó vast javéla te sykliakirél tut te kerél dová, sóstyr dar léla.

⁶Tyré maribnýtka bustiá (striély) isyn vostra (čolalé) dro iló tyré vergéngire, manušypnaskire nácyi peréna tel Túte.

⁷Tyró trono, so Devél dyjá túke, javéla pe saré viéki, tyró kralískiro destó sykavéla, so tu kralinesa čačipnytkes.

⁸Túke isyn drógo čačipén i tu bidykhesa fuipén, paldavá Devél, tyró Devél, pomakhcia tut te svenciakirel bahtiakirde dzetesa (jeliejosa) angíl tyré malende.

⁹Saré tyré uribená šukár khandena mirósa, alojosa i kasjasa, felatiniendyr, so isyn kerdé slonytkone kokalostyr, bašaiben pe balytka strumiénty radynena tut.

¹⁰Kral'jengire čhaja isyn maškír Tyré patyvalé terné džuvliende, králica isyn terdy pašýl Tyró čačó vast dro suvnakáj Irostyr.

¹¹Šun man, čhájo, i dykh, šun rakhunes, so me phenáva: i bistyr péskire manušén i kher tyré dadéskiro.

¹²Kralís drieván prityrdela tyró šukaripén; pal-dová so jov isyn tyró raj i tu javésa te kloninespe patyvása léske.

¹³Tiroskiri čhaj javéla darenca, naj barvaledyr manušá javéna te domarenpe ke tyré — iléskiro tatypen.

¹⁴Kralískiri čhaj isyn naj slavutnedyr saré bare felatiniatyr (kolovóstyr), lákiro uribén isyn khudo suvnakástyr.

¹⁵La janéna dre sane sude ídia; čhajén, lákire malnien (podrugen) pal láte janéna ke králi.

¹⁶Syr len janéna, jone javéna viesiéla (lošalé) i te radynénpe, kiéli zadžána dro kralískiro bari felatin/kolóv (dvorco).

¹⁷Tyré čhavé pe štéto tyré dadéngiro; Tu čhuvésa len thagar'jenca te kralinen,

¹⁸[r.s.] sob (kaj) te javél džindló Tyró lav saré rodénge, paldavá manušýtka nácyi javéna te šarén tut pe saré viéki.