Read Biblija - Pe Baltitko Romani čib (Romanes) 2019 Baltic Romani Bible Psalmy 49 Bible Online

Psalmy 49 - Biblija - Pe Baltitko Romani čib (Romanes) 2019 Baltic Romani Bible bible

Psalmy 49

¹[48-r.s.] Xoróskire Dirižoróske. Psálmo Kariejoskire Čhavéndyr.

²Šunén davá, saré manušále: prišunenpe saré, kon dživéla pe svéto:

³tumé, manušýtka čhavé: barvalé i čororé khetané.

⁴Miro muj phenéla god'varó lav, miro iló déla duma te ĥaljol.

⁵Me pričhuvava péskiro kan ke primiéro (sykoiben) te phenáv, me rozlava miré-giliengiri garady myslia pe gusli.

⁶Sóske mánge te darav, kiéli isyn čoré dyvesá, kiéli čoré vérgi javéna trusciál miré piénty (khurjá)?

⁷Save risjona ke péskiro barvalypén te zrakhenpe i šarena pes odolesa, sósa jone isyn barvalé.

⁸Nikonéske naštý te vykinel péskire pšalés, ci te del vykinybnytko symadý (vykupo) pal léste,

⁹pal-dová so te vykines manušýtko džiibén isyn mol baré lové i len nijékhvar na uhtyléla (nádosi),

¹⁰sob (kaj) manúš te dživél pe saré viéki i, sob (kaj) jov nijékhvar te na džinél meribén.

¹¹Jov dykhéla, syr godé manušá meréna, adiáke-pac' syr dylyné khetané bigodiakirenca xasjona, i mekéna péskiro barvalypén javirénge.

¹²Jone duminéna péske, so léngire kherá javéna pe viéki, so léngire štéty te dživén saré rodénge; mek jone kharéna péskire phuvjá péskire lavénca.

¹³Ne manúš na jačélape dre vučí patýv; jov isyn sýrby murdál (žyvotno), savó muljola.

¹⁴Davá isyn drom dylyné manušéngiro i vaš odolénge, kon radynélape péskire lavéndyr. Séla.

¹⁵Syr bakrén len vykedena vaš liúno (ado), meribén javéla te čaravel len, čačipnaskire manušá javéna te rikirén lofo (vierho) pe lénde zlokostyr i léngiro masá javéna te kirnjon; maĥila javéla léngiro štéto.

¹⁶Ne Devél vykinela miro di liunoskire (adoskire) zorjátyr, pal-dová so Jov Kokoró léla man. Séla.

¹⁷Na dar, kiéli manúš jačéla barvaló, syr sláva pal léskiro kher barjola; pal-dová so jov na léla pésa nisó, a léskiri sláva na džála pal léste;

¹⁸mek jov šardia péskiro di pal péskiro džiibén,

¹⁹mek jone šarde les, so jov kerdiá mištés péske,

²⁰ne jov džála ke léskire-dadengíre ródy te merél, savé butýr na dykhéna dud.

²¹[r.s.] O manúš, savó isyn dre bari patýv, ne savó na ĥaljola, isyn sýrby murdál (žyvotno), savó xasjola.